சென்னையில் திமுக உண்ணாவிரதப் போராட்டத்திற்கு அனுமதி மறுப்பு !

சென்னையில் நாளை திமுக மற்றும் தோழமை கட்சிகள் நடத்தும் உண்ணாவிரதப் போராட்டத்திற்கு போலீசார் அனுமதி மறுத்துள்ளனர்.

மத்திய 3 விவசாய சட்டங்களுக்கு எதிராக டெல்லியில் விவசாயிகள் 22 நாட்களாக போராட்டம் நடத்தி வருகின்றனர். இதற்கு பல்வேறு தரப்பினரும் ஆதரவு கரம் நீட்டியுள்ளனர் .

இதுகுறித்து கடந்த சில நாட்களுக்கு முன்பாக அறிக்கை ஒன்று வெளியிட்ட திமுக, தலைநகர் டெல்லியை முற்றுகையிட்டுப் போராடி வரும் விவசாயிகளுக்காக, விவசாயிகளின் நியாயமான கோரிக்கைகளுக்கு ஆதரவு அளித்து – 18.12.2020 (நாளை) சென்னை – வள்ளுவர் கோட்டத்தில் காலை 8.00 மணி முதல் மாலை 5.00 வரை அறவழியில் மதச்சார்பற்ற முற்போக்குக் கூட்டணி கட்சித் தலைவர்களும் – நாடாளுமன்ற, சட்டமன்ற உறுப்பினர்களும் பங்கேற்கும் ஒரு நாள் அடையாள “உண்ணாநிலைப் போராட்டம்” நடைபெறும் என்று அறிவித்தது.

இந்நிலையில் சென்னை வள்ளுவர் கோட்டத்தில் திமுக நடத்தும் உண்ணாவிரதப் போராட்டத்திற்கு போலீசார் அனுமதி மறுத்துள்ளனர்.ஆனால் டெல்லியில் போராடும் விவசாயிகளுக்கு ஆதரவாக நாளை திட்டமிட்டபடி வள்ளுவர் கோட்டத்தில் உண்ணாவிரதம் நடக்கும் என்று திமுக தலைமை அறிவித்துள்ளது.