ஈரோடு மாவட்டத்தில் அத்திக்கடவு – அவிநாசி திட்டத்தின் கீழ், பல்வேறு இடங்களில் நடைபெற்று வரும் பணிகளை மாவட்ட ஆட்சியர் கதிரவன் நேரில் பார்வையிட்டு, ஆய்வு மேற்கொண்டார்.
பின்னர் செய்தியாளர்களிடம் பேசிய அவர், முன்னாள் முதலமைச்சர் ஜெயலலிதா கோவை, திருப்பூர், ஈரோடு ஆகிய 3 மாவட்ட விவசாய பெருங்குடி மக்களின் 50 ஆண்டுகால கோரிக்கையினை நிறைவேற்றும் வகையில் அத்திக்கடவு – அவிநாசி திட்டம் நிறைவேற்றப்படுமென்று அறிவித்ததாக கூறினார். மேலும், முதலமைச்சர் எடப்பாடி பழனிசாமி 1,652 கோடி மதிப்பீட்டில் இத்திட்டத்தை மாநில அரசின் நிதியிலிருந்தே செயல்படுத்தப்படும் என்ற அறிவித்து, திட்டத்திற்கு அடிக்கல் நாட்டி பணிகளை தொடங்கி வைத்ததாகவும் தெரிவித்தார்.
அதன்படி, அந்த பணி துரிதமாக இரவு, பகல் பாராமல் நடைபெற்றுக் கொண்டிருப்பதாக கூறிய ஆட்சியர், இந்தத் திட்டம் 2021 டிசம்பர் மாதத்திற்குள் முடிக்கப்பட வேண்டும் என்று கால அளவு நிர்ணயிக்கப்பட்டு, பணி வேகமாக நடைபெற்றுக் கொண்டிருப்பதாக தெரிவித்தார். மேலும், அத்திக்கடவு – அவிநாசி திட்டப்பணிகள் மேற்கொள்ளப்பட்டு வரும் பவானி, நல்லாகவுண்டன்பாளையம் மற்றும் திருவாச்சி நீரேற்று நிலையம் மற்றும் பவானி தடுப்பணை ஆகிய இடங்களில் ஆய்வு மேற்கொண்டு, அப்பணிகளை விரைந்து முடித்திட பொதுப்பணித்துறை அலுவலர்களுக்கு உத்தரவிடப்பட்டுள்ளதாகவும் தெரிவித்தார்.
