மக்காச் சோள தோட்டத்தில் ஊடுபயிராக கஞ்சா செடி வளர்ப்பு – விவசாயி கைது
Sep 19, 2020, 14:09 IST1600504745000
ஈரோடு மாவட்டம், சத்தியமங்கலத்தை அடுத்த ஆசனூர் மலைப்பகுதியில் விவசாய நிலத்தில் ஊடுபயிராக கஞ்சா பயிரிட்ட விவசாயியை போலீசார் கைது செய்தனர்.
ஆசனூர் மலைப்பகுதி ஒரத்தி கிராமத்தை சேர்ந்தவர் குருசாமி . இவர் தனக்கு சொந்தமான 7 ஏக்கர் நிலத்தில் மக்காச் சோளம் பயிரிட்டுள்ளார். இந்த நிலத்தில், மக்காச்சோள பயிர்களுக்கு இடையே ஊடுபயிராக கஞ்சா செடி பயிரிட்டுள்ளதாக போலீசாருக்கு ரகசிய தகவல் கிடைத்துள்ளது. சம்பவ இடத்திற்கு சென்ற போலீசார் குருசாமியின் மக்காச்சோள தோட்டத்தில் ஆய்வு செய்தனர்.
அப்போது, சுமார் 2 அடி முதல் 3 அடி வரை வளர்ந்து இருந்த கஞ்சா செடிகள் கண்டுபிடிக்கப்பட்டன. அவற்றின் எடை 4 கிலோ இருக்கும் என போலீசார் தெரிவித்தனர்.
இதையடுத்து விவசாயி குருசாமியை கைது செய்த போலீசார், யாருக்காக கஞ்சா செடி பயிரிட்டார் என விசாரணை மேற்கொண்டுள்ளனர்.