விருதுநகர் கல்குறிச்சியில் திமுக இளைஞரணி மாநாட்டில் அவர் பேசியதாவது;

தமிழகத்தில் கொள்கை மற்றும் லட்சியம் குறித்து அடிப்படை புரிதல் கூட இல்லாமல், வெறும் கூச்சலை மட்டுமே நம்பி அரசியல் செய்யும் கூட்டங்களால் மாநிலத்திற்கு எந்த நன்மையும் விளையப்போவதில்லை என உதயநிதி ஸ்டாலின் விமர்சித்துள்ளார். இத்தகைய அமைப்புகள் வலுவான கட்டமைப்போ அல்லது கட்டுப்பாடோ இன்றி செயல்படுவதால், அவர்களது செயல்பாடுகளால் மக்களுக்கோ அல்லது அவர்களுக்கோ கூட எந்தப் பயனும் இல்லை என்பதை மக்கள் விரைவில் புரிய வைப்பார்கள் என்று அவர் தெரிவித்தார்.

தேர்தல் காலங்களில் மட்டும் முளைக்கும் புதிய கட்சிகளை, திருவிழாக்களில் தற்காலிகமாக வைக்கப்படும் கடைகளோடு அவர் ஒப்பிட்டுப் பேசினார். திருவிழா முடிந்ததுமே அந்தக் கடைகள் காணாமல் போவதைப் போல, தேர்தல் முடிந்ததும் இந்தக் கட்சிகளும் அடையாளம் தெரியாமல் போய்விடும் என்றும், ஆனால் திராவிட முன்னேற்றக் கழகம் மட்டுமே காலம் கடந்து மக்களுடன் மக்களாக நின்று பணியாற்றி வருவதாகவும் அவர் பெருமிதம் தெரிவித்தார்.

மத்தியில் ஆளும் பாசிச சக்திகள், அமலாக்கத்துறை மற்றும் ஊழல் வழக்குகளை ஆயுதமாகப் பயன்படுத்தி அரசியல்வாதிகளை மிரட்டி வருவதாக அவர் குற்றம் சாட்டினார். மிட்டாய் கொடுத்து குழந்தைகளை ஏமாற்றும் 'பிள்ளை பிடிப்பவர்கள்' போல, வழக்குகளில் இருந்து காப்பாற்றுவதாக ஆசை காட்டி அடிமைக் கூட்டங்களை பாசிஸ்டுகள் உருவாக்கி வைத்திருக்கிறார்கள் என்று அதிமுக-வை மறைமுகமாகச் சுட்டிக்காட்டி அவர் சாடினார்.

இறுதியாக, இத்தகைய மிரட்டல்களுக்கு அதிமுக பயப்படலாம், ஆனால் முதலமைச்சர் ஸ்டாலின் தலைமையில் இயங்கும் திமுக தொண்டர்கள் எதற்கும் அஞ்சமாட்டார்கள் என்று அவர் உறுதிபடத் தெரிவித்தார். பாசிஸ்டுகள் எவ்வளவு முயற்சித்தாலும் தமிழகம் அவர்கள் கையில் சிக்காது என்றும், டெல்லி அதிகார மையத்திற்குத் தமிழகம் எப்போதும் 'அவுட் ஆப் கண்ட்ரோல்' தான் என்றும் அவர் தனது உரையில் முழங்கினார்.