அனுப்பப்படாத அந்த கடைசி மெசேஜ்! 15 ஆண்டுகள் கழித்தும் ஆழ்கடலில் தொடரும் கணவனின் தேடல்.. பின்னணியில் நெஞ்சை பிழியும் சோகம்!

2011 மார்ச் 11ஆம் தேதி ஜப்பானின் வடகிழக்கு கடற்கரைப் பகுதியில் ஏற்பட்ட சக்திவாய்ந்த நிலநடுக்கத்தைத் தொடர்ந்து சுனாமி தாக்கியது. ஒனகவா பகுதியில் வசித்து வந்த யசுவோ, அப்போது தனது மாமியாரை மருத்துவமனைக்கு அழைத்துச் சென்றிருந்தார். அவரது மனைவி யூகோ, அங்குள்ள வங்கியில் பணியாற்றி வந்தார். சுனாமி எச்சரிக்கை வெளியானதும், யூகோ உள்ளிட்ட ஊழியர்கள் பாதுகாப்புக்காக வங்கி கட்டிடத்தின் கூரைக்குச் சென்றனர். ஆனால், அங்கு சென்ற சுனாமி அலை அவர்களையும் அடித்துச் சென்றது.

சம்பவத்துக்கு முன்பு யூகோ தனது கணவருக்கு குறுஞ்செய்தி அனுப்பியிருந்தார். அதில், “நீ எங்கே இருக்கிறாய்? நான் வீட்டுக்கு வர விரும்புகிறேன்” என்று தெரிவித்திருந்தார். அந்தச் செய்திக்குப் பிறகு அவரிடம் இருந்து எந்த தகவலும் கிடைக்கவில்லை. பின்னர் அவரது செல்போன் கண்டெடுக்கப்பட்டபோது, அனுப்பப்பட்டிருந்த ஆனால் யசுவோவுக்கு சென்றடையாத மற்றொரு செய்தியும் இருந்தது. அதில் சுனாமி மிகவும் பயங்கரமாக இருப்பதாக யூகோ குறிப்பிட்டிருந்தார்.

மனைவியைத் தேடி பல இடங்களில் அலைந்த யசுவோ, பின்னர் கடலுக்குள் தேட முடிவு செய்தார். 2013ஆம் ஆண்டு மசயோஷி தகஹாஷியிடம் டைவிங் கற்றுக்கொண்டார். அதன் பின்னர், இரு வாரங்களுக்கு ஒருமுறை கடலுக்குள் சென்று தேடுவதை வழக்கமாக்கிக் கொண்டார்.

25 மீட்டருக்கும் அதிகமான ஆழத்தில் நடைபெறும் இந்த தேடலில், கடலுக்கடியில் வீடுகளின் பாகங்கள், வாகனங்கள், மீன்பிடி வலைகள் உள்ளிட்ட பல்வேறு பொருட்களை அவர் பார்க்கிறார். ஒவ்வொரு முறையும் தனது மனைவியின் உடல் அல்லது அவருக்குச் சொந்தமான பொருள் கிடைக்கலாம் என்ற நம்பிக்கையுடன் தேடுகிறார்.

யூகோவின் உடல் இதுவரை கண்டெடுக்கப்படவில்லை. 69 வயதான யசுவோ, தன்னால் முடிந்தவரை இந்த தேடலை தொடரப் போவதாக தெரிவித்துள்ளார். கடலில் இறங்கும் ஒவ்வொரு முறையும் தனது மனைவிக்கு அருகில் இருப்பது போன்ற உணர்வு ஏற்படுவதாகவும் அவர் கூறியுள்ளார்.

சுனாமிக்குப் பிறகு யசுவோ, மனைவி பணியாற்றிய வங்கியின் பாதுகாப்பு நடைமுறைகள் குறித்தும் கேள்வி எழுப்பி நடவடிக்கையை மேற்கொண்டார். அதே நேரத்தில், காணாமல் போன குடும்பங்களுக்கு உதவிய தன்னார்வ டைவர்களுடன் இணைந்து தேடும் பணியையும் மேற்கொண்டார். டைவிங் குறித்து அச்சம் இருந்தாலும், யூகோவைத் தேடும் நோக்கம் அவரை பயிற்சி பெறச் செய்தது.

கடலுக்கடியில் தேடும் பணியில் சிதைவுகள் இருப்பதால் ஆபத்தும் உள்ளது. இருந்தபோதிலும், யசுவோ தனது தேடலை நிறுத்தவில்லை. அவருடன் இருந்த சிலர் வயது காரணமாக டைவிங் செய்ய முடியாத நிலைக்கு சென்றுள்ளனர். ஆனால், யசுவோ மட்டும் இன்னும் கடலுக்குள் செல்கிறார்.

மனைவியை மீண்டும் பார்க்க முடியாது என்பது அவருக்குத் தெரிந்திருந்தாலும், அவரைத் தேட வேண்டும் என்ற எண்ணம் மாறவில்லை. மனைவியின் நினைவுகளுடன் வாழ்வதுடன், அவரைத் தேடும் முயற்சியும் அவரது வாழ்க்கையின் ஒரு பகுதியாக மாறியுள்ளது.