“பழனிச்சாமி தலைமையிலான ஆட்சி தமிழகத்தின் எதிர்காலத்தை மாற்றி அமைக்கும்”- பியூஷ் கோயல்
பிரதமர் நரேந்திர மோடி வழிகாட்டுதல் ஆதரவுடன் எடப்பாடி பழனிச்சாமி தலைமையில் தமிழகத்தின் எதிர்காலத்தை மாற்றி அமைக்கும் என மத்திய தொழில்துறை அமைச்சர் பியூஸ் கோயல் தெரிவித்துள்ளார்.
மதுரையில் நடைபெறும் கட்சி நிகழ்வுக்காக பங்கேற்க சென்னையிலிருந்து விமானம் மூலம் மதுரை வந்த மத்திய தொழில்துறை அமைச்சர் பியூஸ் கோயல் செய்தியாளரை சந்தித்தார். அப்போது பேசிய அவர், “எனது அன்பிற்குரிய நண்பரும் சகோதரருமான டாக்டர் பேராசிரியர் சீனிவாசன் அவர்களுக்கு ஆதரவாக பிரச்சாரம் செய்வதற்காக மதுரை தெற்கு தொகுதியில் இருப்பதில் நான் மட்டற்ற மகிழ்ச்சி அடைகிறேன். அவர் மதுரையின் எதிர்காலத்தை மாற்றியமைக்கக்கூடிய ஒரு சிறந்த கல்வியாளர். எடப்பாடி பழனிசாமி அவர்கள் தலைமையிலான தேசிய ஜனநாயகக் கூட்டணி (NDA) அரசு, இந்தத் தேர்தலில் அமோக வெற்றி பெற்று, புரட்சித் தலைவி செல்வி ஜெயலலிதா அவர்கள் தமிழகத்திற்கு வழங்கிய அந்தச் சிறந்த ஆட்சியை மீண்டும் கொண்டு வருவதற்குத் தயாராக உள்ளது. ஸ்டாலினின் ஊழல் நிறைந்த, திறமையற்ற ஆட்சி தமிழக மக்களால் தோற்கடிக்கப்படும். டாஸ்மாக், மின்சார வாரியம், ஒப்பந்தங்கள், டெண்டர்கள், பணியிட மாற்றங்கள் என அனைத்திலும் ஊழல் மலிந்து காணப்படுகிறது. ஊழல் பணம் கொடுக்காமல் வேலை வாய்ப்புகள் கூட வழங்கப்படுவதில்லை.
ஸ்டாலினின் ஆட்சியின் கீழ் நில மாஃபியாக்கள் மற்றும் மணல் மாஃபியாக்கள் தமிழகத்தை ஆளுகிறார்கள். திமுகவின் அடுத்த முதலமைச்சர் வேட்பாளரான உதயநிதி ஸ்டாலினின் கருத்துக்களால் தமிழகத்தின் கலாச்சாரம் மற்றும் பெருமை மிகவும் புண்பட்டுள்ளது. தமிழக மக்கள் ஒருபோதும் உதயநிதி ஸ்டாலினை முதலமைச்சராக ஏற்றுக்கொள்ள மாட்டார்கள். தமிழ் கலாச்சாரம், தமிழ் பெண்கள் மற்றும் மக்களின் உணர்வுகளை மதிக்காத ஒருவரை அவர்கள் ஒருபோதும் ஏற்க மாட்டார்கள். இந்த அரசு வெளியேற வேண்டிய நேரம் வந்துவிட்டது. மாண்புமிகு பிரதமர் நரேந்திர மோடி அவர்களின் வழிகாட்டுதல் மற்றும் ஆதரவுடன் எடப்பாடி பழனிசாமி தலைமையில் ஒரு நல்லாட்சி இணைந்து தமிழகத்தின் எதிர்காலத்தை மாற்றியமைக்கும். பேராசிரியர் சீனிவாசன் மதுரையில் நன்கு அறியப்பட்ட ஒரு நபர். அவருக்கு மக்களிடம் நல்ல வரவேற்பும் ஆதரவும் கிடைத்துள்ளதை நான் அறிகிறேன்.இந்தத் தேர்தல் ஒரு மாற்றத்திற்கான தேர்தல். தமிழ்நாடு மாற்றத்தை விரும்புகிறது. வணக்கம், நன்றி” என்றார்.