Oracle Layoff: ஊழியர்கள் ஷாக்..! “இன்றே உங்களின் கடைசி வேலை நாள்”..!

அமெரிக்காவைச் சேர்ந்த முன்னணி தொழில்நுட்ப நிறுவனமான Oracle, சில ஊழியர்களுக்கு திடீரென பணிநீக்க அறிவிப்பை அனுப்பியுள்ளதாக சர்வதேச ஊடகங்கள் செய்தி வெளியிட்டுள்ளன. பாதிக்கப்பட்ட ஊழியர்களுக்கு அனுப்பப்பட்ட மின்னஞ்சலில், “இன்றே உங்களின் கடைசி வேலை நாள்” என தெரிவிக்கப்பட்டுள்ளதாக கூறப்படுகிறது.

Oracle நிறுவனத்தின் தற்போதைய வர்த்தகத் தேவைகள் மற்றும் பரந்த அளவிலான நிறுவன மறுசீரமைப்பு நடவடிக்கையின் ஒரு பகுதியாக குறிப்பிட்ட பணியிடங்களை நீக்க முடிவு செய்யப்பட்டுள்ளதாக அந்த மின்னஞ்சலில் தெரிவிக்கப்பட்டுள்ளது. இதன் காரணமாக சம்பந்தப்பட்ட ஊழியர்களின் பணி உடனடியாக முடிவுக்கு வருவதாக கூறப்பட்டுள்ளது.

பணிநீக்கம் செய்யப்பட்ட ஊழியர்களுக்கு அதிகாலை நேரத்தில் அனுப்பப்பட்ட மின்னஞ்சலில், அவர்களின் பணியிடம் நீக்கப்பட்டுள்ளதாக தெரிவிக்கப்பட்டுள்ளது. மேலும், அந்த நாளே அவர்களின் கடைசி வேலை நாளாக இருக்கும் என்றும் கூறப்பட்டுள்ளதாக செய்திகள் தெரிவிக்கின்றன.

இந்த நடவடிக்கையின் மூலம் எத்தனை ஊழியர்கள் பாதிக்கப்பட்டுள்ளனர் என்பது இதுவரை அதிகாரப்பூர்வமாக வெளியிடப்படவில்லை. எனவே, தற்போதைய பணிநீக்க நடவடிக்கையின் மொத்த எண்ணிக்கை குறித்து உறுதியான தகவல் இல்லை.

Oracle நிறுவனத்தின் நிதியாண்டு 2026-ல் சுமார் 21,000 பணியிடங்கள் குறைக்கப்பட்டுள்ளதாக தகவல்கள் தெரிவிக்கின்றன. இது அந்நிறுவனத்தின் மொத்த பணியாளர் எண்ணிக்கையில் சுமார் 13 சதவீதம் குறைப்பாகும். தற்போது தொடங்கியுள்ள புதிய பணிநீக்க நடவடிக்கை, ஏற்கனவே நடைபெற்று வரும் மறுசீரமைப்பின் அடுத்த கட்டமாக பார்க்கப்படுகிறது.

மேலும், Oracle நிறுவனம் AI சார்ந்த உள்கட்டமைப்பில் தொடர்ந்து மிகப்பெரிய முதலீடுகளை மேற்கொண்டு வருகிறது. குறிப்பாக தரவு மையங்களை விரிவுபடுத்துவதற்கான செலவுகள் கணிசமாக உயர்ந்துள்ள நிலையில், நிறுவனத்தின் நிதிச்சுமையை சமநிலைப்படுத்தும் முயற்சிகளும் தொடர்ந்து நடைபெற்று வருகின்றன.