மோடி பேசியபோது ”NEXT PM விஜய்” என்ற பதாகையை காட்டிய தவெகவினர்

சென்னை ஐஐடியில் நடைபெறும் நிகழ்ச்சியில் பிரதமர் மோடி பேசும்போது, 'அடுத்த பிரதமர் விஜய்' என தவெகவினர் பதாகைகள் காட்டிய சம்பவம் அதிர்ச்சியை ஏற்படுத்தியுள்ளது.

சென்னை மெட்ரோ இரண்டாம் கட்டத்தின் பூந்தமல்லி - வடபழனி வழித்தடம் மற்றும் ரூ.13,000 கோடி மதிப்பிலான திட்டங்கள் தொடக்க விழா இன்று காலை நடந்தது. இதில் பிரதமர் நரேந்திர மோடி மற்றும் தமிழக முதல்வர் சி.ஜோசப் விஜய் இருவரும் ஒரே மேடையில் பங்கேற்றனர். விஜய் முதல்வரான பிறகு மோடியுடன் பங்கேற்கும் முதல் அதிகாரப்பூர்வ அரசு விழா இதுவாகும். பிரதமர் மோடி மேடையில் திட்டங்கள் குறித்து பேசிக் கொண்டிருந்த போது, பார்வையாளர்கள் வரிசையில் அமர்ந்திருந்த தவெக நிர்வாகிகள் 5 பேர் திடீரென எழுந்து நின்றனர். கையில் வைத்திருந்த சிறு அட்டைகளை உயர்த்தி காட்டினர். அதில்,"NEXT PM விஜய்" (விஜய் புகைப்படத்துடன்), "TODAY CM, TOMORROW PM" என்று ஆங்கிலத்தில் எழுதப்பட்டிருந்தது. பிரதமரின் பாதுகாப்பு அதிகாரிகள் (SPG) மற்றும் போலீசார் உடனடியாக அவர்களை அமரும்படி கூறினர். அதன்பிறகு அவர்கள் அமர்ந்தனர்.

காலையில் சென்னை விமான நிலையத்தில் முதல்வர் விஜய் கருப்பு சட்டையில் பிரதமர் மோடியை வரவேற்றார். அதுவே ஒரு விவாதமாக இருந்தது. அதே நாளில், மோடி மேடையிலேயே "அடுத்த பிரதமர் விஜய்" என்று போஸ்டர் காட்டியது பாஜக தரப்புக்கு சங்கடத்தை ஏற்படுத்தியுள்ளது. தவெக தொண்டர்கள் கடந்த சில வாரங்களாகவே "2029-ல் விஜய் தான் பிரதமர் வேட்பாளர்" என்று சமூக வலைதளங்களில் பிரச்சாரம் செய்து வந்தனர். அதை நேரடியாக பிரதமர் முன்னிலையிலேயே வெளிப்படுத்தியுள்ளனர். அரசு விழாவை கட்சி விழாவாக தவெகவினர்  மாற்றுகிறார்கள். இது புரோட்டோகால் மீறல் என்று பாஜகவினர்  முணுமுணுக்கின்றனர். இது தொண்டர்களின் அன்பின் வெளிப்பாடு. எங்கள் தலைவர் இன்று முதல்வர், நாளை நாட்டின் பிரதமர் என்பது எங்கள் கனவு என்று தவெகவினர் கொண்டாடுகின்றனர். மொத்தத்தில், பிரதமர் மோடியின் சென்னை வருகையில், மெட்ரோ திட்டங்களை விட "NEXT PM விஜய்" போஸ்டர்கள் தான் அதிகம் பேசப்படும் விஷயமாக மாறியுள்ளது.