ரயில்வேயின் புதிய கிடுக்கிப்பிடி விதிகள்..! இனி பெண்கள் பெட்டியில் ஆண்கள் ஏறினால் ₹2,500 ஸ்பாட் பைன்..! 

ரயில் நிலையங்களில் அனுமதியின்றி பொருட்கள் விற்பனை செய்தால், 2,000 ரூபாய் அபராதம் விதிக்கப்படும். செலுத்த மறுத்தால், நீதிமன்றம் வாயிலாக, 5,000 ரூபாய் வரை அபராதம் செலுத்த நடவடிக்கை எடுக்கப்படும். முன்பதிவு செய்யப்பட்ட பெட்டிகளில் அனுமதியின்றி பயணித்தால், 2,000 ரூபாய்; பெண்களுக்கான பெட்டிகளில் ஆண்கள் பயணித்தால், 2,500 ரூபாய் அபராதம் விதிக்கப்படும். மேலும், ரயிலில் புகைபிடித்தால், 2,000 ரூபாய் அபராதம் விதிக்கப்படும். இந்த புதிய விதிமுறைகள், வரும் 1ம் தேதி முதல் அமலாகும் என, ரயில்வே அறிவித்துள்ளது.

ரயில்களிலும் ரயில்வே வளாகங்களிலும் அனுமதியின்றி நடைபாதை வியாபாரம் மற்றும் பிச்சை எடுத்தால் ரூ. 2,000 அபராதம் விதிக்கப்படும். மீண்டும் மீண்டும் தவறு செய்பவர்களுக்கு ஓராண்டு வரை சிறைத்தண்டனை விதிக்கப்படலாம்.இந்தத் திருத்தங்கள், ரயில் பெட்டிகளிலும் நிலையங்களிலும் பிச்சை எடுப்பதை வெளிப்படையாகத் தடை செய்கின்றன.

தொந்தரவு செய்தல், தகாத அல்லது ஆபாசமான வார்த்தைகளைப் பயன்படுத்துதல், ரயில்வே வசதிகளுக்கு இடையூறு செய்தல் அல்லது சக பயணிகளுக்கு அசௌகரியத்தை ஏற்படுத்துதல் போன்ற செயல்களில் ஈடுபடும் பயணிகளுக்கு ரூ.1,000 அபராதம் விதிக்கப்படலாம். போதையில் இருப்பது கண்டறியப்பட்டு, இடையூறு செய்பவர்கள் ரயில்கள் மற்றும் நிலையங்களில் இருந்து அகற்றப்படலாம், மேலும் அவர்களும் தண்டனைகளை எதிர்கொள்ள நேரிடலாம்.

ஒதுக்கப்பட்ட பெட்டிகள், இருக்கைகள் அல்லது படுக்கைகளை ஆண்கள் ஆக்கிரமிக்கும்போது அவர்களுக்கு ரூ.2,500 அபராதம் விதிக்கப்படும். அத்தகைய பயணிகளை அகற்றுவதற்கு ரயில்வே ஊழியர்களுக்கு அதிகாரம் வழங்கப்படும். ரயில்களில் தடைசெய்யப்பட்ட அல்லது அபாயகரமான பொருட்களை எடுத்துச் சென்றால், குறைந்தபட்சம் ரூ.10,000 அபராதம் விதிக்கப்படலாம்.