"ரேஷன் கார்டு வைத்திருப்பவர்களுக்கு ஜாக்பாட்!" – தீபாவளிக்கு இலவச மளிகை தொகுப்பு வழங்க திட்டம்..?
தமிழகத்தில் தற்போது அரிசி, துவரம்பருப்பு, சர்க்கரை மற்றும் அத்தியாவசிய மளிகைப் பொருட்களின் விலைகள் கணிசமாக அதிகரித்து வருகின்றன. நாட்டின் பிற மாநிலங்களை விடத் தமிழகத்தில்தான் விலைவாசி உயர்வு உச்சத்தில் இருப்பதாக எதிர்க்கட்சிகள் தொடர் குற்றச்சாட்டுகளை முன்வைத்து வருகின்றன. இத்தகைய கடுமையான விலைவாசி உயர்வு, ஆட்சிப் பொறுப்பில் இருக்கும் த.வெ.க. அரசுக்கு அரசியல் ரீதியாகவும் நிர்வாக ரீதியாகவும் பெரும் நெருக்கடியை ஏற்படுத்தியுள்ளது.
இந்தச் சூழலைச் சமாளிக்கவும், வரவிருக்கும் தீபாவளி பண்டிகைக் காலத்தில் மக்களுக்கு நேரிடையாக நிவாரணம் வழங்கவும் அரசு தீவிரமாக யோசித்து வருகிறது. அதன்படி, தமிழகத்தில் உள்ள அனைத்து ரேஷன் குடும்ப அட்டைதாரர்களுக்கும் ரேஷன் கடைகள் வாயிலாகத் தீபாவளி சிறப்பு இலவச மளிகைப் பொருட்களை வழங்கத் தமிழக அரசு திட்டமிட்டு வருகிறது. இத்திட்டத்தைச் செயல்படுத்துவதற்குத் தேவையான நிதி மற்றும் உத்தேசச் செலவினங்கள் குறித்து உடனடியாக விரிவான அறிக்கை அளிக்குமாறு நிதித் துறை அதிகாரிகளுக்கு முதலமைச்சர் விஜய் உத்தரவிட்டுள்ளதாகத் தகவல்கள் வெளியாகியுள்ளன.
பொதுமக்களின் அதிருப்தியைக் குறைக்கவும், பண்டிகைக் காலத்தில் குடும்ப வரவு செலவுச் சுமையைத் தணிக்கவும் இத்தகைய இலவச மளிகைப் பொருட்கள் தொகுப்பு பெரும் உதவியாக இருக்கும் என முதலமைச்சர் விஜயிடம் சில மூத்த அமைச்சர்கள் ஆலோசனை வழங்கியுள்ளனர். மேலும், சமையல் எண்ணெய், பருப்பு வகைகள், ரவை, மைதா, மற்றும் தீபாவளி பலகாரங்கள் செய்யத் தேவையான அத்தியாவசியப் பொருட்களை உள்ளடக்கிய சிறப்புக் கூப்பன்கள் அல்லது பொருட்கள் நேரடியாக வழங்கப்படலாம் என எதிர்பார்க்கப்படுகிறது.
இது தொடர்பான இறுதிக்கட்ட நிதி ஒதுக்கீடு மற்றும் விநியோக முறைகள் குறித்துத் தலைமைச் செயலகத்தில் தீவிர ஆலோசனைகள் நடைபெற்று வருகின்றன. எதிர்க்கட்சிகளின் விமர்சனங்களுக்கு முற்றுப்புள்ளி வைக்கும் வகையிலும், ஏழை எளிய மக்களின் ஆதரவைப் பெறும் வகையிலும், தீபாவளி பண்டிகைக்கு முன்பாகவே இந்த இலவச மளிகைத் தொகுப்பு குறித்த அதிகாரப்பூர்வ அறிவிப்பை முதலமைச்சர் விஜய் வெளியிடுவார் எனத் தலைமைச் செயலக வட்டாரங்கள் தெரிவிக்கின்றன.