துபாய்க்கு போன அப்புறம்தான் தெரியுது... "பேசாமல் இந்தியாவிலேயே இருந்திருக்கலாம்!" இணையத்தை கலக்கும் இளைஞரின் வீடியோ!
மேற்கு வங்க மாநிலம் கொல்கத்தாவைச் சேர்ந்த ராகுல் பாலா என்ற சமையல் கலைஞர் (Chef), வெளிநாட்டிற்குச் சென்று வேலை செய்ய வேண்டும் என்பதைத் தனது நீண்ட நாள் கனவாகக் கொண்டிருந்தார். ஆனால், தனது கனவு நனவாகி துபாய்க்குச் சென்ற பிறகுதான், அங்குள்ள அன்றாட வாழ்க்கைச் செலவுகளை எதிர்கொள்வது எவ்வளவு கடினம் என்பதை உணர்ந்ததாகத் தெரிவித்துள்ளார்.
சமீபத்தில் தனது இன்ஸ்டாகிராம் பக்கத்தில் அவர் பகிர்ந்துள்ள வீடியோவில், வேலைக்காக துபாய்க்கு வரத் திட்டமிடும் இந்தியர்கள் அனைவரும் ஒன்றுக்கு பலமுறை யோசித்து முடிவெடுக்க வேண்டும் என அறிவுறுத்தியுள்ளார்.
துபாய் வாழ்க்கையின் நிதர்சனம் குறித்துப் பேசிய ராகுல் பாலா:
"நாம் துபாய் திரஹாமைக் (AED) கணக்கிட்டு இந்திய ரூபாயாக மாற்றும்போது அது மிகப்பெரிய தொகையாகத் தெரியும். ஆனால், துபாயிலேயே தங்கி அந்தப் பணத்தைச் செலவழிக்கும் போதுதான் இங்குள்ள வாழ்க்கைச் செலவின் பாரம் புரியும். ஒரு சாதாரண உழைப்பாளியால் அனைத்துச் செலவுகளையும் முடித்துவிட்டு வீட்டிற்குப் பணம் அனுப்புவதோ அல்லது சேமிப்பதோ மிக மிகக் கடினம்" என்று தெரிவித்துள்ளார்.
ஒரு நேரச் சாதாரண உணவிற்கே குறைந்தபட்சம் 10 திரஹாம் (சுமார் ₹260) வரை செலவாகிறது. உணவு, குடிநீர் மற்றும் இதர அன்றாடத் தேவைகளுக்கே பெரும் தொகை செலவாகிவிடுகிறது.உதாரணமாக, ஒருவருக்கு மாத சம்பளமாக 2,500 திரஹாம் கிடைத்தால், அதை இந்திய ரூபாயாக மாற்றும்போது ₹65,168 எனப் பெரிய தொகையாகத் தோன்றும். ஆனால், துபாயின் தங்குமிடம் மற்றும் உணவுச் செலவுகளைக் கழித்துவிட்டுப் பார்த்தால், கையில் மிஞ்சும் சேமிப்புத் தொகை மிகவும் சொற்பமானதாகவே இருக்கும்.துபாய்க்கு வந்த பிறகே, இந்தியாவின் அருமையும் அங்குள்ள எளிய வாழ்க்கையின் நிம்மதியும் தமக்கு முழுமையாகப் புரிந்ததாக அவர் ஆதங்கத்துடன் குறிப்பிட்டுள்ளார்.
இவரது இந்த உண்மையான பதிவு, வெளிநாடுகளில் வாழும் ஆயிரக்கணக்கான இந்திய இளைஞர்களின் மனதைத் தொட்டுள்ளது. இவருடைய பதிவிற்கு இணையவாசிகள் பலரும் தங்களது கருத்துகளைப் பதிவு செய்து வருகின்றனர்.
-
இணையவாசி ஒருவர்: "போதிய பணம் இல்லை என்றால் துபாய் வாழ்க்கை உண்மையிலேயே மிகவும் நரகமானது. இங்குப் பணம் தான் எல்லாமே" எனக் குறிப்பிட்டிருந்தார்.
-
மற்றொரு பயனர்: "சகோதரா, நம்பிக்கையை இழக்க வேண்டாம். ஆரம்பத்தில் கடினமாகத்தான் இருக்கும். அனுபவம் கூடக்கூட நல்ல சம்பளம் கிடைக்கும்" என ஆறுதல் கூறியுள்ளார்.
-
துபாயில் பணிபுரியும் மற்றொருவர்: "நான் முதன்முதலில் துபாய்க்கு வந்தபோது என் சம்பளம் 2,300 திரஹாம் தான். ஆனால் உழைப்பால் இன்று 5,000 திரஹாமிற்கும் அதிகமாகச் சம்பாதிக்கிறேன். தொடர்ந்து உழையுங்கள், நல்ல எதிர்காலம் உண்டு" எனத் தன் அனுபவத்தைப் பகிர்ந்து ஊக்கமளித்துள்ளார்.