கொல்கத்தாவில் அரங்கேறிய கொடூரம்! 3 பேரை ஆடையின்றி ஊர்வலமாக அழைத்து சென்ற கொடூர கும்பல்!

கொல்கத்தாவின் சசூனா (Sarsuna) பகுதியில், இடைக்காலத்து பழங்குடி பஞ்சாயத்து தண்டனைகளை நினைவூட்டும் வகையிலான அதிர்ச்சிகரமான சம்பவம் ஒன்று அரங்கேறியுள்ளது. 18 வயது இளைஞர், அவரது தந்தை மற்றும் 19 வயது நண்பர் ஆகிய மூவரைத் தாக்குதலுக்கு உள்ளாக்கி, துப்பாக்கி முனையில் மிரட்டி, உடைகளைக் களைந்து குறுகிய தெருவில் 50 மீட்டருக்கும் அதிகமாக நிர்வாணமாக ஊர்வலமாக அழைத்துச் சென்றுள்ளனர். இந்தச் சம்பவம் அப்பகுதியில் பெரும் பரபரப்பையும் கொந்தளிப்பையும் ஏற்படுத்தியுள்ளது.

 

கடந்த அக்டோபர் 25 அன்று, சசூனா பகுதிக்குட்பட்ட குடிராம் பள்ளி பகுதியில் உள்ள கால்பர் மாத் (Khalpar Math) அருகே, 18 வயது இளைஞர் தனது 13 வயது சிறுமிக்கு முத்தமிட்டதாகக் கூறப்படுகிறது. இதைப் பார்த்த சிறுமியின் உறவினரின் நண்பர் ஒருவர், சிறுமியின் தந்தை மற்றும் தாய்மாமனுக்குத் தகவல் தெரிவித்துள்ளார்.

 

உடனடியாக அந்த இளைஞரையும், அவருடன் வந்த 19 வயது நண்பரையும் பிடித்துச் சென்ற சிறுமியின் குடும்பத்தினர், அவர்களை ஒரு அறைக்குள் பூட்டி வைத்து கொடூரமாகத் தாக்கியுள்ளனர்.

பின்னர், அந்த இளைஞரின் தந்தையையும் வீட்டிற்கு அழைத்துள்ளனர். அங்கு வந்த அவரையும் சரமாரியாகத் தாக்கி, கொன்றுவிடுவதாகத் துப்பாக்கி முனையில் மிரட்டியுள்ளனர்.

இதுகுறித்து பாதிக்கப்பட்ட இளைஞரின் தந்தை கூறுகையில்:

"எங்கள் மூவரையும் அறைக்குள் அடைத்து வைத்துக் கொடூரமாகத் தாக்கினார்கள். தொடர்ந்து அடித்தால் நாங்கள் இறந்துவிடுவோம் என்று நினைத்த அவர்கள், எனக்கு ஒரு தேர்வை அளித்தார்கள். 'உன் மகனை நீயே சுட்டுக் கொல் அல்லது கத்தியால் குத்திக் கொல்' என்றார்கள். அதற்குச் சிறுமியின் தாய், 'அவ்வளவு சுலபமாக விட்டுவிடக் கூடாது; கத்தியை கேஸ் அடுப்பில் சூடேற்றித் தருகிறேன், அதை வைத்து உன் மகனின் வயிற்றில் குத்து' என்றார்.

என் மகனின் உயிரைக் காப்பாற்ற வேறு வழியில்லாமல், அவர்களின் மிரட்டலுக்குப் பணிந்து உடைகளைக் களைய ஒப்புக்கொண்டேன்," என்று கண்ணீருடன் தெரிவித்தார்.

தடுக்க வந்த அக்கம் பக்கத்தினரையும் துப்பாக்கியைக் காட்டிச் சுட்டுவிடுவதாக கொடூர கும்பல் மிரட்டியதாக அப்பகுதி மக்கள் தெரிவிக்கின்றனர்.

இந்தக் கொடூரச் சம்பவத்தைக் கண்டித்து, திங்கள்கிழமை அன்று அப்பகுதி மக்கள் திரண்டு குற்றவாளிகளின் வீட்டை அடித்து நொறுக்கினர். மேலும், குற்றவாளிகளைக் கைது செய்யக் காலதாமதம் செய்ததாகக் கூறி காவல்துறையினருடன் வாக்குவாதத்தில் ஈடுபட்டனர்.

ஆனால், தாமதம் ஏதும் ஏற்படவில்லை என்று மறுத்துள்ள காவல்துறை, சிறுமியின் பெற்றோர் மற்றும் தாய்மாமன் உட்பட 3 பேரைக் கைது செய்துள்ளதாகத் தெரிவித்துள்ளது

.கூடுதல் போலீஸ் கமிஷனர் (குற்றம்) குணால் அகர்வால் கூறுகையில்:

"கொலை முயற்சி, கூட்டுத் தாக்குதல், கடத்தல், மிரட்டல், சட்டவிரோதக் காவல் மற்றும் சட்டவிரோத ஆயுதப் பயன்பாடு உள்ளிட்ட பல பிரிவுகளின் கீழ் சசூனா காவல் நிலையத்தில் வழக்குப் பதிவு செய்யப்பட்டுள்ளது. முதன்மை குற்றவாளிகள் 3 பேர் கைது செய்யப்பட்டுள்ளனர். மற்றவர்களைப் பிடிக்கத் தேடுதல் வேட்டை நடந்து வருகிறது. பாதிக்கப்பட்ட இளைஞர்களுக்கு மருத்துவப் பரிசோதனை முடிந்துள்ளது. வழக்கில் சிசிடிவி காட்சிகள் சேகரிக்கப்பட்டு வருகின்றன," என்றார்.

குற்றவாளிகளுக்கு ஆளும் திரிணாமுல் காங்கிரஸ் கட்சியின் பின்னணி இருப்பதாக அப்பகுதி மக்கள் குற்றம் சாட்டியுள்ளனர். இருப்பினும், இந்த குற்றச்சாட்டை திரிணாமுல் காங்கிரஸ் கட்சி திட்டவட்டமாக மறுத்துள்ளதுடன், இந்தச் சம்பவத்துக்கும் கட்சிக்கும் எந்தத் தொடர்பும் இல்லை என்றும், இதைப் தேவையில்லாமல் அரசியலாக்க வேண்டாம் என்றும் தெரிவித்துள்ளது.