ஹீரோ சைக்கிள்ஸ் ஒப்பந்தத்தை கைப்பற்றியது: பள்ளி மாணவர்களுக்கு ஹெல்மெட், வாட்டர் பாட்டிலுடன் நவீன மிதிவண்டிகள்!

தமிழ்நாடு அரசின் பிற்படுத்தப்பட்டோர் நல இயக்ககம் சார்பில், 2026-27ஆம் ஆண்டில் பள்ளி மாணவ-மாணவியருக்கு ஹெல்மெட் மற்றும் தண்ணீர் பாட்டிலுடன் கூடிய நவீன மிதிவண்டிகள் வழங்கப்பட உள்ளன. 

மாணவர்களுக்கு இலவச சைக்கிள் வழங்குவதற்கான டெண்டர் கடந்த ஆகஸ்ட் மாதத்தில் கோரப்பட்டது.

அரசின் நவீன மிதிவண்டித் திட்டத்திற்கு மிகக்குறைந்த விலையைக் கோரிய ஏலதாரராக (L1) ஹீரோ சைக்கிள்ஸ் நிறுவனம் தேர்வாகியுள்ளது.

வரிகள் உட்பட மாணவர்களுக்கு ரூ.7,235 மற்றும் மாணவிகளுக்கு ரூ.7,476 என விலை கோரப்பட்டுள்ளது.

மொத்தம் தேவைப்படும் 5,32,388 மிதிவண்டிகளுக்கு ரூ.392 கோடி செலவாகும் என மதிப்பிடப்பட்டுள்ளது. பட்ஜெட்டில் ரூ.277 கோடி ஒதுக்கப்பட்டுள்ள நிலையில், பணி ஆணை வழங்கப்பட்ட பின் கூடுதல் நிதி ஒதுக்கப்படும் என எதிர்பார்க்கப்படுகிறது.

சைக்கிள்களுடன் சேர்த்து தலைக்கவசமும் தண்ணீர் பாட்டிலும் வழங்கப்படவிருக்கிறது.

இந்த ஹீரோ சைக்கில் நிறுவனம் மொத்தம் 5,32,388 மிதிவண்டிகள் தயாரித்து வழங்க உள்ளது. இந்த ஒப்பந்தப்புள்ளியில் குறிப்பிடப்பட்ட விலையில் மிதிவண்டிகளை கொள்முதல் செய்தால், மொத்தச் செலவு ₹392 கோடியாக இருக்கும். ஆனால் இந்தத் திட்டம் அறிவிக்கப்பட்ட போது ஒதுக்கப்பட்ட பட்ஜெட் ரூபாய். 277 கோடி ஆகும். பணி ஆணை (Work Order) வழங்கப்பட்ட பிறகு, இத்திட்டத்தைச் செயல்படுத்துவதற்குத் தேவையான கூடுதல் நிதி ஒதுக்கீடு செய்யப்படும் என எதிர்பார்க்கப்படுகிறது.

ஒப்பந்தத்தில் கூறப்பட்ட நிபந்தனைகள்

மிதிவண்டிகள் IS 10613:2023 தரநிலைக்கு உட்பட்டு தயாரிக்கப்பட வேண்டும். ஏலம் கோரும் நிறுவனமே ஃபிரேம் மற்றும் ஃபோர்க்கை தயாரிக்க வேண்டும். அவற்றை வேறு நிறுவனங்களிடம் உற்பத்தி செய்வதற்கு ஒப்படைக்கக் கூடாது.

மாணவர்களுக்கு மிதிவண்டி Lilac Mist நிறத்திலும், Army Green நிறத்திலும் வழங்கப்பட வேண்டும்.

ஃபிரேம், கேரியர், ஹேண்டில் பார் மற்றும் ஃபோர்க் ஆகியவை குறிப்பிட்ட வேதியியல் கலவை கொண்ட ERW ஸ்டீல் குழாய்களைக் கொண்டு IS 2039 மற்றும் IS 10613:2023 தரநிலைகளின்படி தயாரிக்கப்பட வேண்டும்.

தமிழ்நாடு அரசின் அதிகாரப்பூர்வ இலச்சினை குறைந்தபட்சம் 40 மி.மீ. விட்டத்தில் மிதிவண்டியின் ஃபிரேமில் உள்ள Head Tube அல்லது Seat Tube சந்திப்பில் அழியாத வகையில் லேசர் மூலம் பொறிக்கப்பட வேண்டும் அல்லது Tamper-proof rivet மூலம் பொருத்தப்பட வேண்டும்.

வழங்கப்படும் தலைக்கவசங்கள் IS 18808:2025 தரநிலைக்கு உட்பட்டதாக இருக்க வேண்டும். இதற்கான அங்கீகரிக்கப்பட்ட சான்றிதழை சமர்ப்பிக்க வேண்டும்.

தண்ணீர் பாட்டில் IS 10910:1984 தரநிலைக்கு உட்பட்டதாக இருக்க வேண்டும். சுமார் 4,500 பள்ளிகளுக்கு, தலா 2 பராமரிப்பு கருவிகள் இலவசமாக வழங்கப்பட வேண்டும்.

மாணவர்களுக்கு மிதிவண்டிகள் வழங்கப்பட்ட நாளிலிருந்து 30 நாட்களுக்குள் ஏதேனும் குறைபாடுகள் கண்டறியப்பட்டால், சம்பந்தப்பட்ட விநியோகஸ்தர் தனது சேவைப் பணியாளர்கள் மூலம் அவற்றை உடனடியாக சரிசெய்து தர வேண்டும்.