உங்க சிம் கார்டை வேற யாருக்காவது கொடுத்திருக்கீங்களா? ஜாக்கிரதை... ரூ.50 லட்சம் வரை அபராதம் பாயும்!

ஒருவரது பெயரில் வாங்கப்பட்ட சிம் கார்டை, அந்த நபரின் பெயரில் தொடர்ந்து வைத்திருக்காமல் மற்றொரு நபருக்கு விற்பனை செய்வதும் அல்லது மாற்றிக் கொடுப்பதும் தவிர்க்கப்பட வேண்டும் என தெரிவிக்கப்பட்டுள்ளது.

சிம் கார்டு எந்த நபரின் பெயரில் பதிவு செய்யப்பட்டுள்ளதோ, அந்த நபரின் அடையாளத்துடன் இணைந்தே தொலைத்தொடர்பு சேவை வழங்கப்படுகிறது. எனவே, பதிவு செய்யப்பட்ட நபரைத் தவிர வேறு ஒருவர் அந்த இணைப்பைப் பயன்படுத்தும் வகையில் சிம் கார்டை விற்பனை செய்வது அல்லது மாற்றிக் கொடுப்பது சட்டரீதியான சிக்கல்களுக்கு வழிவகுக்கலாம்.

தொலைத்தொடர்பு துறை தெரிவித்துள்ள எச்சரிக்கையின்படி, போலி ஆவணங்கள், ஆள்மாறாட்டம் உள்ளிட்ட முறைகேடுகளில் ஈடுபடுபவர்களுக்கு ரூ.50 லட்சம் வரை அபராதம் மற்றும் 3 ஆண்டுகள் வரை சிறைத் தண்டனை விதிக்கப்படலாம்.

எனவே, சிம் கார்டுகளை வாங்கும்போது சரியான ஆவணங்களை மட்டுமே பயன்படுத்த வேண்டும் என்றும், தங்களது பெயரில் பெறப்பட்ட சிம் கார்டுகளை மற்றவர்களுக்கு விற்பனை செய்யக்கூடாது என்றும் பொதுமக்கள் அறிவுறுத்தப்பட்டுள்ளனர்.

சிம் கார்டு விதிமீறல் தொடர்பான விதிகளை பொதுமக்கள் அறிந்து கொண்டு, மொபைல் இணைப்புகளை பெறும்போதும் பயன்படுத்தும்போதும் உரிய நடைமுறைகளை பின்பற்ற வேண்டும் என தொலைத்தொடர்பு துறை எச்சரித்துள்ளது.