பள்ளியில் சமையல் காஸ் காலி.. மாணவனை மரம் ஏறச் சொன்ன அவலம்: இடுப்பு எலும்பு உடைந்து துடிக்கும் 12-ம் வகுப்பு மாணவர்!

கோவை மாவட்டம் பெரியநாயக்கன்பாளையம் அருகே உள்ள தனியார் பள்ளி ஒன்றில், 12-ம் வகுப்பு மாணவர் ஒருவர் மரத்திலிருந்து விழுந்து படுகாயமடைந்த சம்பவம் பெரும் அதிர்ச்சியை ஏற்படுத்தியுள்ளது. ஜோதிபுரம் பகுதியில் செயல்பட்டு வரும் அந்தப் பள்ளியில், கூடலூர் கவுண்டம்பாளையம் பகுதியைச் சேர்ந்த நந்தகுமார் என்ற மாணவர் விடுதியில் தங்கிப் பயின்று வருகிறார். தாயாரின் உடல்நலக்குறைவு காரணமாக கடந்த ஓராண்டாக விடுதி மாணவராக இருந்து வரும் அவருக்கு, பள்ளி நிர்வாகத்தின் அலட்சியத்தால் தற்போது இடுப்பு எலும்பு முறிந்து சிகிச்சை பெறும் நிலை ஏற்பட்டுள்ளது.

சம்பவம் நடந்த கடந்த வியாழக்கிழமை அன்று, பள்ளியின் விடுதியில் சமையல் எரிவாயு (Gas) தீர்ந்துவிட்டதாகக் கூறப்படுகிறது. இதனால் காலையில் மாணவர்களுக்கு வெறும் ரொட்டி மட்டுமே உணவாக வழங்கப்பட்டுள்ளது. மதிய உணவிற்காக விறகு அடுப்பைப் பயன்படுத்தத் திட்டமிட்ட பள்ளி ஆசிரியர்கள், மாணவர்களையே விறகு சேகரிக்கப் பணித்துள்ளனர். பாதுகாப்புக் கருவிகள் ஏதுமின்றி, காய்ந்த மரக்கிளைகளை உடைக்குமாறு மாணவர்களை வற்புறுத்தியது நிர்வாகத்தின் மிகப்பெரிய விதிமீறலாகப் பார்க்கப்படுகிறது.

ஆசிரியர்களின் உத்தரவை ஏற்று நந்தகுமார் உள்ளிட்ட மாணவர்கள் அங்குள்ள காய்ந்த மரத்தில் ஏறியுள்ளனர். மரம் மிகவும் பலவீனமாக இருந்ததால், மாணவர் நந்தகுமார் ஏறியிருந்த கிளை திடீரென முறிந்தது. இதில் சுமார் 15 அடி உயரத்தில் இருந்து கீழே விழுந்த மாணவருக்கு இடுப்புப் பகுதியில் பலத்த காயம் ஏற்பட்டது. இடுப்பு எலும்பு உடைந்த நிலையில் வலியால் துடித்த மாணவனுக்கு உடனடியாக முறையான மருத்துவச் சிகிச்சை அளிக்காமல், சுமார் ஒரு மணி நேரம் ஐஸ் கட்டிகளை வைத்துப் பள்ளி அறையிலேயே முதலுதவி செய்ய முயன்றது அதிர்ச்சியை ஏற்படுத்தியுள்ளது.

நிலைமை மோசமானதைத் தொடர்ந்து, பள்ளியின் காவலாளி வாகனத்தைப் பெற்று மாணவரை ஜோதிபுரத்தில் உள்ள தனியார் மருத்துவமனையில் அனுமதித்துள்ளனர். இந்த விபத்து குறித்து மாணவனின் பெற்றோருக்கு முறையான தகவல் தெரிவிக்கப்படவில்லை எனக் கூறப்படுகிறது. அக்கம் பக்கத்தினர் அளித்த தகவலின் பேரில் பதறியடித்து வந்த பெற்றோர், பள்ளி நிர்வாகத்திடம் விளக்கம் கேட்டுள்ளனர். ஆனால், நிர்வாகத் தரப்பில் உரியப் பதில் அளிக்கப்படாததால் பெற்றோர் கடும் மன உளைச்சலுக்கு ஆளாகினர்.

இந்த விவகாரம் தொடர்பாகப் பாதிக்கப்பட்ட மாணவனின் பெற்றோர் பெரியநாயக்கன்பாளையம் காவல் நிலையத்தில் புகார் அளித்துள்ளனர். மாணவர்களைக் கல்வி கற்க அனுப்பும் இடத்தில், அவர்களை ஆபத்தான பணிகளில் ஈடுபடுத்தியது குறித்துப் போலீசார் தீவிர விசாரணை மேற்கொண்டு வருகின்றனர். தனியார் பள்ளிகளில் மாணவர்களின் பாதுகாப்பு கேள்விக்குறியாகி வரும் நிலையில், சம்பந்தப்பட்ட பள்ளி நிர்வாகத்தின் மீது கடுமையான நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்துள்ளனர்.