தொட்டதெல்லாம் துலங்க, தடைகள் உடைய அஷ்டமியில் காலபைரவருக்கு இதை செய்யுங்க..!

காலபைரவரை நாம் வழிபாடு செய்யும்பொழுது நம்முடைய வாழ்க்கையில் இருக்கக்கூடிய அனைத்து விதமான பிரச்சனைகளுக்கும் தீர்வு காட்டுவதோடு நமக்கு காவல் தெய்வமாக இருந்து காப்பாற்றுவார் என்று கூறப்படுகிறது. காலபைரவரை நாம் வழிபாடு செய்வதன் மூலம் நவகிரகங்களின் அருளையும் நம்மால் ஒருசேர பெற முடியும். அப்படிப்பட்ட கால பைரவரை வழிபாடு செய்வதற்குரிய வளர்பிறை அஷ்டமி நாளில் செய்ய வேண்டிய ஒரு சூட்சமமான வழிபாடு நம்முடைய தடைகளையும் தடங்கல்களையும் நீக்கும்.

சிவபெருமானின் மறு அவதாரமாக திகழக்கூடியவர் கால பைரவர் என்றும் கால பைரவரை வழிபாடு செய்பவர்களுக்கு துர்மரணங்கள் ஏற்படாது என்றும், எதிரிகளின் தொல்லை நீங்கும் போன்ற பலவிதமான நன்மைகள் உண்டாகும். மேலும் நவகிரகங்களில் இருக்கக்கூடிய சனீஸ்வர பகவானின் குருவாக இவர் திகழ்வதால் நவக்கிரக தோஷத்தை நீக்கி நமக்கு நல்வழியை காட்டுவார். தேய்பிறை அஷ்டமியில் கடன் பிரச்சினை தீருவதற்காக காலபைரவரை வழிபாடு செய்வதன் மூலம் அற்புதமான பலனை பெற முடியும் என்று ஆன்மீக ரீதியாக கூறப்படுகிறது.

அஷ்டமி திதியும் வழிபாட்டுப் பலன்களும்

காலபைரவரை வழிபாடு செய்வதற்கு மிகவும் உகந்த திதியாக அஷ்டமி திதி திகழ்கிறது. நம்முடைய தேவைகளுக்கு ஏற்ப அஷ்டமி வழிபாட்டை இரண்டு வகையாகப் பிரித்து மேற்கொள்ளலாம்:

• தேய்பிறை அஷ்டமி: நம்முடைய வாழ்க்கையில் இருக்கும் கஷ்டங்கள் அனைத்தும் தீர்வதற்கும், தீராத கடன் பிரச்சினைகளில் இருந்து விடுபடுவதற்கும் தேய்பிறை அஷ்டமி வழிபாடு அற்புதமான பலனைத் தரும்.

• வளர்பிறை அஷ்டமி: நம்முடைய வாழ்க்கையில் செல்வ வளம் அதிகரிப்பதற்கும், புதிய காரியங்கள் தடையின்றித் தொடங்குவதற்கும் வளர்பிறை அஷ்டமி நாளில் வழிபாடு செய்ய வேண்டும்.

எந்த ஒரு செயலைச் செய்யும் பொழுதும் தொடர்ந்து முட்டுக்கட்டைகளும், தடைகளும் வந்து கொண்டே இருக்கிறது என்று கவலைப்படுபவர்கள் வளர்பிறை அஷ்டமியிலோ, தேய்பிறை அஷ்டமியிலோ அல்லது பைரவருக்கு உகந்த சுப தினமான ஞாயிற்றுக்கிழமை ராகு காலத்திலோ கீழே குறிப்பிட்டுள்ள சூட்சும வழிபாட்டைச் செய்யலாம்.

தடைகளைத் தகர்க்கும் வெட்டிவேர் மாலை சூட்சும வழிபாடு

நம்முடைய வாழ்வில் வெற்றிகளை வாரி வழங்கக் கூடிய ஒரு அற்புதமான வேராகத் தான் இந்த வெட்டிவேர் திகழ்கிறது. இந்த வழிபாட்டைச் செய்வதற்குத் தேவையான பொருட்கள் மற்றும் செய்யும் முறை பின்வருமாறு:

தேவையான பொருட்கள்:

• ஒரு வெட்டிவேர் மாலை

• பன்னீர் (ரோஸ் வாட்டர்)

• ஜவ்வாது மற்றும் புனுகு

• 8 நல்லெண்ணெய் தீபங்கள் (அகல் விளக்குகள்)

வழிபாட்டு முறை:

1. முதலில் வெட்டிவேரை அழகிய மாலையாகத் தொடுத்து, அருகில் இருக்கக்கூடிய காலபைரவரின் ஆலயத்திற்கு எடுத்துச் செல்ல வேண்டும்.

2. ஆலயத்தை அடைந்ததும், அந்த வெட்டிவேர் மாலையைத் தூய்மையான பன்னீரில் முழுவதுமாக நனைய வைக்க வேண்டும்.

3. பின்னர், பன்னீரில் நனைத்த அந்த வெட்டிவேர் மாலையை விபூதி நாதரான காலபைரவருக்குச் சாற்ற வேண்டும்.

4. காலபைரவர் எப்போதும் வாசனைப் பிரியர் என்று கூறப்படுவதால், வெட்டிவேர் மாலையுடன் சேர்த்து ஜவ்வாது, புனுகு போன்ற நறுமணப் பொருட்களையும் அர்ச்சனைக்கு வாங்கிக் கொடுக்க வேண்டும். இதனால் பைரவர் மனம் மகிழ்ந்து நம் செயல்களில் இருக்கும் தடைகளை நீக்குவார் என்பது நம்பிக்கை.

5. இதனைத் தொடர்ந்து, பைரவர் சந்நிதியில் 8 நல்லெண்ணெய் தீபங்களை வரிசையாக ஏற்றி வைத்து, நம்முடைய குறைகளையும் தடைகளையும் நீக்கக் கோரி மனமுருகி வேண்டிக் கொள்ள வேண்டும்.

வேண்டுதல் நிறைவேறிய பின் செய்ய வேண்டியவை

இந்தத் தனித்துவமான ஆன்மீக முறையில் நீங்கள் காலபைரவரை வழிபடத் தொடங்கும்போது, ஒவ்வொரு காரியத்திலும் வரும் தடைகள் நீங்கி காரிய வெற்றியும், மனநிம்மதியும் உங்களுக்குக் கிடைக்கும்.

இவ்வாறு நீங்கள் வேண்டிக்கொண்ட காரியம் எந்தவிதத் தடங்கலுமின்றி வெற்றிகரமாக நடைபெற்று முடிந்த பிறகு, மீண்டும் காலபைரவர் ஆலயத்திற்குச் செல்ல வேண்டும். அங்கு பைரவருக்குச் செய்யப்படும் அபிஷேகத்திற்காக அனைத்து விதமான அபிஷேகப் பொருட்களையும் வாங்கிக் கொடுப்பதோடு, அவருக்கு உகந்த வஸ்திரமும் (ஆடை) சமர்ப்பித்து, உங்களுடைய நன்றியறிதலைத் தெரிவிக்க வேண்டும்.

கால பைரவருக்கு உகந்த நன்னாளில் இந்த எளிய மற்றும் சூட்சுமமான முறையில் அவரை வழிபட்டு, வாழ்வில் இருக்கும் தடைகளும் தடங்கல்களும் நீங்கி சகல வளங்களையும் பெறுங்கள்!

.