விவசாயிகளே இந்த திட்டம் பற்றி தெரியுமா.?  100% பாசன மானியம் திட்டம்..! 

பிரதான் மந்திரி கிரிஷி சிஞ்சாய் யோஜனா திட்டத்தில் சிறு, குறு விவசாயிகளுக்குச் சொட்டு நீர் மற்றும் தெளிப்பு நீர்ப்பாசனம் அமைக்க 100 சதவீத முழு மானியமும், இதர விவசாயிகளுக்கு 75 சதவீத மானியமும் வழங்கப்படுகிறது. நீர் வீணாவதைத் தடுத்து விளைச்சலை உயர்த்தும் நோக்கில் தரப்படும் இச்சலுகையைப் பெற பட்டா, சிட்டா, அடையாள அட்டை மற்றும் வங்கிக் கணக்கு புத்தகத்துடன் வட்டார வேளாண்மை அல்லது தோட்டக்கலைத் துறை அலுவலகத்தில் விண்ணப்பிக்கலாம்.

விவசாயத்திற்கு தேவையான அளவு தண்ணீர் இல்லாத காரணத்தால் பெரும்பாலான விளைநிலங்கள் கருகியும், பல நிலங்களில் விவசாயிகள் விவசாயம் செய்ய முன்வராமலும் நஷ்டத்தை சந்தித்து வருகின்றனர். இதற்கிடையில், அதிகரித்து வரும் வெப்பநிலையும், குறைந்து வரும் நிலத்தடி நீர்மட்டமும் விவசாயத்துக்கு மேலும் நெருக்கடியாக மாறிவருகின்றன.

இந்த நிலையில், குறைந்த அளவு தண்ணீரை வைத்து விவசாயத்தை மேம்படுத்த உதவும் சொட்டு நீர்ப்பாசன முறையை உயர்த்துவதற்காக விவசாயிகளுக்கு நிதியுதவி வழங்கும் திட்டத்தை இந்திய அரசு கொண்டுவந்தது. அந்த திட்டத்தின் பெயர் பிரதான் மந்திரி கிரிஷி சிஞ்சாய் யோஜனா திட்டம் ஆகும்.

பிரதான் மந்திரி கிரிஷி சிஞ்சாய் யோஜனா திட்டம் (Pradhan Mantri Krishi Sinchayee Yojana Scheme) என்பது விவசாயிகளுக்கு நீர்ப்பாசன வசதியை ஏற்படுத்தி கொடுத்து பயிர் விளைச்சலை அதிகரிப்பதற்காக 01 ஜூலை 2015 அன்று இந்திய அரசாங்கத்தால் அறிமுகப்படுத்தப்பட்ட ஒரு தேசிய நீர்ப்பாசனத் திட்டமாகும்.

ஒவ்வொரு வயலுக்கும் தண்ணீர் (Har Khet ko Pani) மற்றும் ஒரு துளிக்கு அதிக பயிர் (Per Drop More Crop) என்ற தொலைநோக்குப் பார்வையின் அடிப்படையில் தொடங்கப்பட்ட இந்த திட்டத்தின் மூலம் விவசாயிகளுக்கு சொட்டு நீர்ப்பாசனம் அமைப்பதற்கு நிதியுதவி அளிக்கப்படுகிறது.

பிரதம மந்திரி கிரிஷி சிஞ்சாய் யோஜனா திட்டத்தின் முக்கிய நோக்கங்கள்
விவசாயம் செய்ய பருவமழையை சார்ந்திருப்பதைக் குறைத்து, ஆண்டு முழுவதும் தண்ணீர் கிடைக்க செய்து, குறிப்பாக குறைந்த அளவு தண்ணீரை பயன்படுத்தி பயிர் விளைச்சலை மேம்படுத்துவதன் மூலம் விவசாயிகளின் வருமானத்தை உயர்த்துவதே இந்த பிரதம மந்திரி கிரிஷி சிஞ்சாய் யோஜனா திட்டத்தின் முதன்மையான நோக்கமாக உள்ளது.

அத்துடன், இந்தியாவில் சொட்டு நீர்ப்பாசனம் மற்றும் தெளிப்பு நீர்ப்பாசனம் போன்ற நவீன நீர்ப்பாசன தொழில்நுட்பங்களின் பயன்பாட்டை ஊக்குவிப்பது; விவசாய நிலங்களிலும் அதைச் சுற்றியுள்ள பகுதிகளிலும் தடையில்லா தண்ணீர் கிடைப்பதை உறுதி செய்வது; தண்ணீர் வீணாவதைக் குறைப்பது போன்றவையும் இத்திட்டத்தின் நோக்கங்களாகும்.

பிரதம மந்திரி கிரிஷி சிஞ்சாய் யோஜனா திட்டத்தின் நன்மைகள் என்ன?
இந்த திட்டத்தின் கீழ், விவசாயிகளுக்கு சொட்டு நீர்ப்பாசனம் அமைப்பதற்கு மானியம் வழங்கப்படுகிறது. அதன்படி, சிறு மற்றும் குறு விவசாயிகளுக்கு திட்ட செலவில் 55% மும், மற்ற விவசாயிகளுக்கு 45% மும் மானியமாக வழங்கப்படும்.

சொட்டு நீர்ப்பாசனம் அமைப்பதன் மூலமாக பயிர்களின் வேர் பகுதிக்கு உரிய நேரத்தில் தேவையான தண்ணீர், ஊட்டச்சத்து மற்றும் உரம் உள்ளிட்டவை வழங்கப்படுவதால், பயிரின் மகசூல் அதிகரிக்கப்படுகிறது.

இதனால், விவசாயிகளின் உழைப்பும் நேரமும் குறையும். மேலும், சாதாரண பாசன முறையுடன் ஒப்பிடுகையில், சொட்டு நீர்ப்பாசன முறையின் மூலமாக கிட்டத்தட்ட 70 சதவீத நீரை சேமிக்கலாம்.

நீர் தேங்கும் நிலம் மணற்பாங்கான பகுதிகள், உப்பு நிலங்கள், ஏற்ற இறக்கம் உடைய நிலங்கள், மற்றும் மலை பகுதிகள் என அனைத்து பகுதிகளிலும் இப்பாசன முறையை அமைத்து சாகுபடி செய்ய முடியும்.

PMKSY மானியத்திற்கு யார் விண்ணப்பிக்கலாம்?
பிரதம மந்திரி கிரிஷி சிஞ்சாய் யோஜனா திட்டத்தின் பயனாளிகள் விவசாயிகள் தான். விவசாய நிலம் சொந்தமாக வைத்துள்ள அனைத்து வகுப்பு மற்றும் பிரிவைச் சேர்ந்த விவசாயிகளும் இத்திட்டத்துக்கு விண்ணப்பிக்கலாம்.

குத்தகை ஒப்பந்தத்தின் கீழ் விவசாயம் செய்யும் விவசாயிகளும் இத்திட்டத்திற்கு விண்ணப்பிக்கலாம்.

தனிப்பட்ட விவசாயிகள் மட்டுமல்லாமல், மற்ற விவசாயிகளுடன் நில உரிமையைப் பகிர்ந்துக் கொண்டு உற்பத்தியாளர் விவசாயிகள் குழுவாகவும் விண்ணப்பிக்கலாம். அந்த குழுவில் குறைந்தது 50% பேர் நில உரிமையாளர்களாக இருக்க வேண்டும்.

அதேபோல், சுய உதவிக்குழுக்கள், விவசாய கூட்டுறவு சங்கங்கள் மற்றும் தண்ணீர் பயனர் சங்கங்கள் போன்ற விவசாயத்தை ஆதரிக்கும் நிறுவனங்களின் உறுப்பினர்களும் இத்திட்டத்துக்கு விண்ணப்பிக்கலாம்.

பிரதம மந்திரி கிரிஷி சிஞ்சாய் யோஜனா மானியத்திற்கான தகுதி வரம்புகள்
இந்த திட்டத்தின் கீழ் சொட்டு நீர்ப்பாசனம் அமைக்கப்பதற்கு மானியம் பெற குறைந்தபட்ச அல்லது அதிகபட்ச நில அளவு கட்டுப்பாடு எதுவும் இல்லை. இருப்பினும், நீங்கள் வைத்திருக்கும் நிலத்தின் அளவைப் பொறுத்து இந்த திட்டத்தின் கீழ் வழங்கப்படும் நிதியுதவியின் அளவு தீர்மானிக்கப்படும் என்பதை நினைவில் கொள்ளவும்.

அதேப்போல், இத்திட்டத்திற்கு விண்ணப்பிக்க விரும்பும் விவசாயிகள் இந்தியாவை சேர்ந்தவராக இருக்க வேண்டும். சொந்தமாக விவசாய நிலம் வைத்திருக்கும் விவசாயிகள் அதற்கான அனைத்து ஆவணங்களையும் வைத்திருக்க வேண்டும்.

குத்தகை நிலத்தில் விவசாயம் செய்யும் விவசாயிகள் தண்ணீர் மற்றும் நில குத்தகை ஆவணத்தை வழங்க வேண்டும். மேலும், இந்த திட்டத்திற்கான மானியம் நேரடிப் பலன் பரிமாற்றம் மூலம் பயனாளியின் வங்கி கணக்கிற்கே செலுத்தப்பட உள்ளதால், வங்கி கணக்கு மற்றும் ஆதார் கட்டாயம் வைத்திருக்க வேண்டும்.

இந்த திட்டத்தின் கீழ் ஒரு பயனாளிக்கு 5 ஹெக்டேர் நிலத்திற்கான சொட்டு நீர்ப்பாசனம் அமைப்பதற்கு மானியம் வழங்கப்படும்.

ஏற்கனவே தங்கள் பண்ணைக்கு இந்த திட்டத்தின் கீழ் மானியம் பெற்ற பயனாளிகள், அடுத்த ஏழு ஆண்டுகளுக்கு இத்திட்டத்துக்கு விண்ணப்பிக்க முடியாது.

குறிப்பு: இந்த திட்டத்தின் கீழ் விவசாயிகளுக்கு வழங்கப்படும் மானியத்தில் BIS குறியிடப்பட்ட அமைப்புகள் அல்லது கூறுகளை மட்டுமே வாங்க வேண்டும்.

பிரதம மந்திரி கிரிஷி சிஞ்சாய் யோஜனா திட்டத்திற்கு தேவைப்படும் ஆவணங்கள்
இந்த திட்டத்தின் கீழ், சொட்டு நீர்ப்பாசனம் அமைக்க விரும்பும் விவசாயிகள் பின்வரும் ஆவணங்களை சமர்ப்பிக்க வேண்டும்.

• ஆதார் கார்டு
• பான் கார்டு
• வாக்காளர் அடையாள அட்டை
• கணினி மூலம் பெறப்பட்ட சிட்டா
• அடங்கல்
• நிலவரைபடம்
• சொத்து வரி ரசீது
• குடும்ப அட்டையின் நகல்
• விண்ணப்பதாரரின் பேங்க் பாஸ்புக் நகல்
• விண்ணப்பதாரரின் 3 பாஸ்போர்ட் அளவு புகைப்படம்
• FMB ஸ்கெட்ச்
• மண் மற்றும் நீர் சோதனை அறிக்கைகள்
• சிறு, குறு விவசாயிகளுக்கான வட்டாட்சியரின் சான்றிதழ்
• சாதிச் சான்றிதழ்
• இருப்பிடச் சான்றிதழ்
• குத்தகை நிலம் உள்ள விவசாயிகள் நீர் மற்றும் நில குத்தகை ஆவணத்தை வழங்க வேண்டும் (7 ஆண்டுகள் பதிவு செய்யப்பட்ட குத்தகை)

பிரதம மந்திரி கிரிஷி சிஞ்சாய் யோஜனா திட்டத்திற்கு எப்படி விண்ணப்பிப்பது?
இந்த திட்டத்தின் கீழ் மானியம் பெற விரும்பும் விவசாயிகள் அந்தந்த மாவட்ட வேளாண் அலுவலகத்தை நேரடியாக தொடர்பு கொண்டு விண்ணப்பிக்கலாம். சம்பந்தப்பட்ட அதிகாரிகள் உங்களுடைய விண்ணப்பத்தை சரிபார்த்துவுடன் மானியத் தொகை வங்கி கணக்கில் டெபாசிட் செய்யப்படும்.