ஒரிஜினல் களவாணியே முதலமைச்சர் விஜய் தான்..! - டிடிவி தினகரன் கடும் விமர்சனம்..!
தவெக தலைவரும் முதலமைச்சருமான விஜய் மற்றும் அம்மா மக்கள் முன்னேற்றக் கழகத்தின் (அமமுக) பொதுச்செயலாளர் டிடிவி தினகரன் ஆகியோருக்கு இடையேயான அரசியல் மோதல் தற்பொழுது உச்சக்கட்டத்தை எட்டியுள்ளது. குதிரை பேரம் மற்றும் சட்டமன்ற உறுப்பினர்களைத் தன்வசம் இழுக்கும் அரசியல் குறித்து முதல்வர் விஜய் அண்மையில் காரசாரமாக விமர்சித்திருந்தார். குறிப்பாக, மாற்று அரசியல் பேசுபவர்கள் என்று கூறிக்கொண்டு திரைக்குப் பின்னால் எம்எல்ஏக்களைத் திருடும் வேலைகளில் சில சக்திகள் ஈடுபடுவதாக அவர் குற்றம் சாட்டியிருந்தார். முதல்வர் விஜய்யின் இந்த “எம்எல்ஏ திருடர்கள்” என்ற விமர்சனம் தமிழக அரசியல் வட்டாரத்தில் பெரும் விவாதப் பொருளாக மாறியது.
முதல்வர் விஜய்யின் இந்த கடுமையான தாக்குதலுக்கு அமமுக பொதுச்செயலாளர் டிடிவி தினகரன் தற்பொழுது மிகக் கடுமையான முறையில் பதிலடி கொடுத்துள்ளார். செய்தியாளர்களிடம் பேசிய அவர், தமிழக வெற்றிக் கழகம் தங்களை ஒரு தூய சக்தி என்று கூறிக்கொண்டு மக்களை ஏமாற்றி வருவதாகவும், உண்மையில் குதிரை பேர அரசியலில் ஈடுபடும் “முதல் குற்றவாளி” மற்றும் “ஒரிஜினல் களவாணி” முதல்வர் விஜய் தான் என்றும் மிக ஆவேசமாக சாடியுள்ளார். மன்னார்குடி தொகுதியில் அமமுக சார்பில் வெற்றி பெற்ற ஒரே ஒரு சட்டமன்ற உறுப்பினரான எஸ். காமராஜை தங்கள் பக்கம் இழுத்து, சட்டமன்றத்தில் தங்களுக்கு ஆதரவளிக்க வைத்ததே தவெக தான் என்று அவர் நேரடியாக குற்றம் சாட்டினார்.
இந்த மோதலின் பின்னணியில் தவெக மற்றும் அமமுக இடையே ஏற்கனவே நடைபெற்ற ஆதரவுக் கடித சர்ச்சை மிக முக்கியப் பங்க வகிக்கிறது. அமமுக எம்எல்ஏ எஸ். காமராஜ் தவெக ஆட்சி அமைக்க ஆதரவு தெரிவித்துக் கொடுத்த கடிதம் போலியானது என்று கூறி டிடிவி தினகரன் காவல்துறை மற்றும் ஆளுநரிடம் புகார் அளித்திருந்தார். ஆனால், காமராஜ் தானாக முன்வந்து மகிழ்ச்சியுடன் கடிதம் எழுதுவது போன்ற வீடியோ ஆதாரத்தை தவிக தரப்பு வெளியிட்டு, தினகரன் பொய் பரப்புரை செய்வதாகத் தெரிவித்தது. இதனைத் தொடர்ந்து, சட்டமன்றத்தில் முதல்வர் விஜய்யைப் பாராட்டிப் பேசிய எம்எல்ஏ எஸ். காமராஜை கட்சியின் ஒழுங்கு நடவடிக்கையை மீறியதாகக் கூறி அமமுகவிலிருந்து டிடிவி தினகரன் உடனடியாக நீக்கினார் என்பதும் குறிப்பிடத்தக்கது.
தற்பொழுது தமிழகத்தில் நிலவும் இந்த அரசியல் குதிரை பேரக் குற்றச்சாட்டுகள் குறித்து காங்கிரஸ், இடதுசாரிகள் உள்ளிட்ட பல்வேறு அரசியல் கட்சிகளும் தங்களது கருத்துக்களைத் தெரிவித்து வருகின்றன. தேர்தல் மூலம் மக்களின் முழுமையான ஆதரவைப் பெற்று ஆட்சிக்கு வராமல், இதுபோன்ற மாற்று வழிமுறைகள் மூலம் அரசியல் ஆதாயம் தேட முயலும் சக்திகளை மக்கள் உன்னிப்பாகக் கவனித்து வருவதாக டிடிவி தினகரன் எச்சரித்துள்ளார். தற்போதைய சூழலில், தமிழக முதலமைச்சர் விஜய் தலைமையிலான புதிய அரசுக்கும், எதிர்க்கட்சிகளுக்கும் இடையேயான இந்த வார்த்தைப் போர் வரும் நாட்களில் மேலும் தீவிரமடையும் என்றே அரசியல் விமர்சகர்கள் கருதுகின்றனர்.