#BREAKING : உத்தராகண்டில் அடுத்தடுத்து நிலநடுக்கம்..!!

உத்தராகண்ட் மாநிலம் உத்தரகாசியில் பூமிக்கு அடியில் 11 கி.மீ ஆழத்தில் 4.2 ரிக்டர் அளவிலும், பாகேஷ்வரில் 2.8 ரிக்டர் அளவிலும் நிலநடுக்கம் பதிவாகியுள்ளது.

ஒரே மாவட்டத்தில் கடந்த நான்கு நாட்களுக்குள் அடுத்தடுத்துநில அதிர்வுகள் ஏற்படுவது இது இரண்டாவது முறையாகும். தொடர் நிலநடுக்கங்கள் காரணமாக பொதுமக்கள் விழிப்புணர்வுடனும் பாதுகாப்பாகவும் இருக்குமாறு மாநில அரசு அறிவுறுத்தியுள்ளது.

உத்தரகாண்ட் மாநிலத்தில் சனிக்கிழமை மாலை மிதமான நிலநடுக்கம் ஏற்பட்டது. உத்தர்காசி மாவட்டத்தில் ஏற்பட்ட இந்த நிலநடுக்கம் 4.2 ரிக்டர் அளவுகோலில் பதிவாகியுள்ளதாக தேசிய நிலஅதிர்வு மையம் (National Centre for Seismology) தெரிவித்துள்ளது.

இந்த நிலநடுக்கமானது மலைப்பாங்கான அந்தப் பகுதியில் இரவு 8.07 மணியளவில் உணரப்பட்டது.

இது சனிக்கிழமை அன்று உத்தரகாண்டில் பதிவான இரண்டாவது நிலநடுக்கமாகும். இதற்கு சுமார் நான்கு மணி நேரத்திற்கு முன்பு, மாநிலத்தின் பாகேஷ்வர் மாவட்டத்திலும் லேசான நடுக்கம் உணரப்பட்டது. இந்தச் சம்பவங்களால் உயிர்சேதமோ அல்லது பொருட்சேதமோ ஏற்பட்டதாக இதுவரை எந்தத் தகவலும் வெளியாகவில்லை.

இதற்கிடையில், கடந்த அக்டோபர் 6 ஆம் தேதியன்று, உத்தரகாண்டின் சமோலி மாவட்டத்தில் இரவு 10.20 மணியளவில் 4.9 ரிக்டர் அளவுகோலில் நிலநடுக்கம் ஏற்பட்டது. இதன் அதிர்வுகள் டெல்லி மற்றும் அதன் அருகிலுள்ள பகுதிகளிலும் உணரப்பட்டன. இந்த நிலநடுக்கம் தலைநகர் மற்றும் சுற்றியுள்ள நகரங்களில் பொதுமக்களிடையே பெரும் பீதியை ஏற்படுத்தியது.