#BIG NEWS : டீ கடைகளுக்கு நற்செய்தி! மின் கட்டணத்தில் யூனிட்டிற்கு ரூ.2 மானியம்..!

எரிவாயு தட்டுப்பாட்டினால் உணவகங்கள், டீக்கடைகள் மற்றும் கிளவுட் கிச்சன் போன்றவை பெரும் பாதிப்பைச் சந்தித்துள்ளன. இதனைச் சமாளிக்க, கேஸ் அடுப்புகளுக்குப் பதிலாக மின் அடுப்புகளைப் பயன்படுத்தும் போது ஏற்படும் கூடுதல் மின் நுகர்விற்கு, ஒரு யூனிட்டிற்கு 2 ரூபாய் மானியம் வழங்கப்படும் என்று அரசு அறிவித்துள்ளது. முதல்வர் மு.க. ஸ்டாலின் தலைமையில் நடைபெற்ற உயர்மட்ட ஆலோசனைக் கூட்டத்திற்குப் பிறகு, மின் வாரியத் தலைவர் ஜெ. ராதாகிருஷ்ணன் இது தொடர்பான நிவாரணத் திட்டங்களை அறிவித்தார்.

எரிவாயு தட்டுப்பாட்டைச் சமாளிக்கப் புதிய மின் சாதனங்களை வாங்க விரும்பும் சிறு மற்றும் குறு தொழில்துறையினருக்கு அரசு பல்வேறு சலுகைகளை வழங்குகிறது. மின்சார சமையல் உபகரணங்கள் வாங்குவதற்காக ரூ. 3.05 லட்சம் வரையிலான கடனுதவி வழங்கப்படுகிறது. இதில் 25 சதவீத மானியம் உண்டு என்பது குறிப்பிடத்தக்கது. இக்காலத்தில் மின் பயன்பாடு அதிகரித்தாலும், அது வழக்கமான மின் பயன்பாட்டுக் கணக்கீட்டின் அடிப்படையில் பார்க்கப்படாது என உறுதியளிக்கப்பட்டுள்ளது. வணிக நிறுவனங்கள் பயமின்றி மின் அடுப்புகளைப் பயன்படுத்த இது வழிவகுக்கும்.

எரிவாயுவைப் பயன்படுத்தும் குறு, சிறு மற்றும் நடுத்தரத் தொழில் நிறுவனங்கள், மின் அடுப்புகள் மற்றும் மின் சூடேற்றிகள் போன்ற உபகரணங்களை வாங்குவதற்குப் பல்வேறு திட்டங்களின் கீழ் மானியத்துடன் கூடிய கடன் வழங்க ஆணையிடப்பட்டுள்ளது: UYEGP திட்டம்: 25% மானியம் (அதிகபட்சம் ₹3.75 லட்சம்). மகளிர் தொழில் முனைவோர் திட்டம்: 25% மானியத்துடன் ₹10 லட்சம் வரை கடன். அண்ணல் அம்பேத்கர் திட்டம்: 35% மானியம் (அதிகபட்சம் ₹1 கோடி வரை).

தொழிற்சாலைகள் எல்பிஜிக்கு மாற்றாக விறகு, மண்ணெண்ணெய் அல்லது பயோமாஸ் போன்றவற்றை எரிபொருளாகப் பயன்படுத்தத் தமிழ்நாடு மாசுக்கட்டுப்பாட்டு வாரியத்தின் முன்அனுமதி பெறத் தேவையில்லை. இது குறித்த தகவலை மட்டும் வாரியத்திற்குத் தெரிவித்தால் போதுமானது. இந்த விலக்கு எரிவாயுத் தட்டுப்பாடு நீங்கும் வரை நடைமுறையில் இருக்கும். உணவகங்கள் மூடப்படுவதால் விவசாய விளைபொருட்களின் விற்பனை பாதிக்கப்படாமல் இருக்க, தமிழகத்தில் உள்ள 194 உழவர் சந்தைகளில் விவசாயிகள் தங்களது காய்கறிகள் மற்றும் பழங்களை எவ்விதக் கட்டுப்பாடும் இன்றி விற்பனை செய்ய அனுமதி அளிக்கப்பட்டுள்ளது. மேலும், ஆவின் நிறுவனம் பால் உற்பத்தியாளர்களிடமிருந்து உபரிப் பாலைத் தடையின்றிப் பெற்றுக்கொள்ளவும், குடும்ப அட்டைதாரர்களுக்கு இந்த மாதம் கூடுதலாக 3228 கிலோ லிட்டர் மண்ணெண்ணெய் வழங்கவும் உத்தரவிடப்பட்டுள்ளது.

எரிவாயு தட்டுப்பாடு தொடர்பான நிலவரத்தை மாநில அரசு தினமும் கூர்ந்து கவனித்து வருகிறது. தட்டுப்பாட்டைச் சீர்செய்யத் தொழில் துறை அமைப்புகள், வணிகர் சங்கங்கள் மற்றும் எரிவாயு விநியோக நிறுவனங்களுடன் தொடர்ந்து ஆலோசனைகள் நடத்தப்பட்டு வருகின்றன. இந்தச் சவாலான சூழலில் உணவகத் துறையினரும், டீக்கடை உரிமையாளர்களும் தங்களது வணிகத்தைத் தொய்வின்றித் தொடர தமிழக அரசு மேற்கொண்டுள்ள இந்தத் துரித நடவடிக்கை பெரும் வரவேற்பைப் பெற்றுள்ளது. இந்த அறிவிப்புகளின் மூலம், தட்டுப்பாட்டினால் வணிகம் முடங்கும் என்ற அச்சத்தில் இருந்த ஆயிரக்கணக்கான சிறு வணிகர்களுக்குப் பெரிய அளவில் நிம்மதி கிடைத்துள்ளது.