#BIG NEWS:  இந்த துறையில் வேலை செய்பவரா நீங்கள்..? அப்போ நீங்களும் தபால் ஓட்டு போடலாம்..! 

யாரெல்லாம் தபால் வாக்கு செலுத்தலாம்?

பொதுவாக தேர்தல் பணிகளில் நேரடியாக ஈடுபடும் ஆசிரியர்கள் மற்றும் அரசு ஊழியர்களுக்கு மட்டுமே வழங்கப்பட்டு வந்த இந்த வசதி, தற்போது கீழ்க்கண்ட அத்தியாவசியத் துறைகளுக்கும் நீட்டிக்கப்பட்டுள்ளது:

அரசுப் போக்குவரத்துக் கழகம்: பேருந்து ஓட்டுநர்கள், நடத்துநர்கள் மற்றும் தொழில்நுட்பப் பணியாளர்கள்.

மின்வாரியம் (TANGEDCO): தடையற்ற மின் விநியோகத்தைப் பராமரிக்கும் களப்பணியாளர்கள்.

போக்குவரத்துக் காவல்: தேர்தல் நாளன்று போக்குவரத்து நெரிசலைக் கட்டுப்படுத்தும் காவலர்கள்.

சிறைத்துறை: சிறைக்காவலர்கள் மற்றும் அதிகாரிகள்.

தீயணைப்பு மற்றும் மீட்புப் பணி: அவசரக் கால மீட்புப் பணிகளில் ஈடுபடும் வீரர்கள்.

சுகாதாரத் துறை: அவசர சிகிச்சை மற்றும் ஆம்புலன்ஸ் சேவையில் உள்ள மருத்துவப் பணியாளர்கள்.

ஏன் இந்த மாற்றம்?

தேர்தல் நாளன்று மேற்கண்ட துறைகளைச் சேர்ந்த ஊழியர்கள் விடுமுறை எடுக்க முடியாமல் பணியில் இருக்க வேண்டிய சூழல் உள்ளது. இதனால், அவர்கள் தங்கள் சொந்தத் தொகுதிகளுக்குச் சென்று வாக்களிக்க முடியாத நிலை இதுவரை நீடித்து வந்தது. இந்த இடைவெளியைக் குறைக்கும் வகையில், இவர்களை "அத்தியாவசியப் பணிப் பிரிவினர்" (Essential Services Category) என அங்கீகரித்து தேர்தல் ஆணையம் இந்த அறிவிப்பை வெளியிட்டுள்ளது.

விண்ணப்பிக்கும் முறை :

தபால் வாக்கு பெற விரும்பும் தகுதியுள்ள பணியாளர்கள், தேர்தல் அறிவிப்பு வெளியான பிறகு அதற்கான பிரத்யேக விண்ணப்பப் படிவத்தை (Form 12D) பூர்த்தி செய்து, தங்கள் துறை சார்ந்த நோடல் அதிகாரியிடம் சமர்ப்பிக்க வேண்டும். அந்த விண்ணப்பங்கள் சரிபார்க்கப்பட்டு, தேர்தல் நடத்தும் அலுவலரிடம் ஒப்படைக்கப்படும். பின்னர், அவர்களுக்கு ஒதுக்கப்பட்ட தபால் வாக்கு மையங்களில் (Postal Ballot Voting Centres) குறிப்பிட்ட தேதிகளில் வாக்களிக்க வழிவகை செய்யப்படும்.

இந்த வசதியைப் பயன்படுத்திக் கொள்ளும் பணியாளர்கள், தேர்தல் நாளன்று நேரில் சென்று சாதாரண வாக்குச் சாவடியில் வாக்களிக்க முடியாது என்பது குறிப்பிடத்தக்கது. தேர்தல் ஆணையத்தின் இந்த முற்போக்கான நடவடிக்கை, அரசுப் பணியாளர்கள் மத்தியில் பெரும் வரவேற்பைப் பெற்றுள்ளது. இது தேர்தல் நாளில் நூறு சதவீத வாக்களிப்பை உறுதி செய்ய உதவும் என எதிர்பார்க்கப்படுகிறது. ஏற்கனவே, வாக்களிக்க தகுதியான அனைவரும் வாக்களிப்பதை உறுதி செய்ய வேண்டும், ஓட்டு சதவீதத்தை அதிகரிக்க வேண்டும் என்பதற்காக தேர்தல் நாளன்று தேர்தல் நடக்கும் மாநிலங்களில் அரசு மற்றும் தனியார் துறைகளில் பணியாற்றுபவர்களுக்கு சம்பளத்துடன் விடுமுறை அளிக்க வேண்டும் என தேர்தல் கமிஷன் உத்தரவிட்டிருந்தது குறிப்பிடத்தக்கது.