ஆர்வமுடன் கலை பயிலும் செவித்திறன், பேச்சுத்திறன் குறைபாடுள்ள குழந்தைகள்!!! 3 நாட்கள் கலை விருந்து

செவித்திறன் மற்றும் பேச்சுத்திறன் குறைபாடுள்ள குழந்தைகளிடம் தன்னம்பிக்கை, திறமை மற்றும் பண்பாட்டு பிணைப்பை வளர்க்கும் வகையில் கலை, நாட்டுப்புற மரபுகள் மற்றும் படைப்பாற்றல் வெளிப்பாட்டை அறிமுகப்படுத்தும் முயற்சியாக தென்மண்டல பண்பாட்டு மையம் சார்பில் டாக்டர் எம்.ஜி.ஆர். இல்லம் மற்றும் மேல்நிலைப் பள்ளியில் மூன்று நாள் பண்பாட்டு நிகழ்ச்சி கோலகலமாக தொடங்கியுள்ளது.

இந்திய அரசின் கலாச்சார அமைச்சகத்தின் கீழ் செயல்படும் தஞ்சாவூர், தென்மண்டல பண்பாட்டு மையம் (South Zone Cultural Centre), சென்னை, ராமாபுரத்தில் உள்ள செவித்திறன் மற்றும் பேச்சுத்திறன் குறைபாடுள்ள குழந்தைகளுக்கான டாக்டர் எம்.ஜி.ஆர். இல்லம் மற்றும் மேல்நிலைப் பள்ளியில் (Dr MGR Home and Higher Secondary School) இன்று (12 ஆகஸ்ட் 2026) பயிலரங்கு மற்றும் பண்பாட்டு நிகழ்ச்சியைத் தொடங்கியது. குழந்தைகளிடம் கலை, நாட்டுப்புற மரபுகள் மற்றும் படைப்பாற்றல் வெளிப்பாட்டை ஊக்குவிக்கும் வகையில் இந்த நிகழ்ச்சி ஏற்பாடு செய்யப்பட்டுள்ளது. தஞ்சாவூர், தென்மண்டல பண்பாட்டு மையத்தின் இயக்குநரும், புகழ்பெற்ற பண்பாட்டு வரலாற்றாசிரியர் மற்றும் எழுத்தாளருமாகிய கே. கே. கோபாலகிருஷ்ணன் தலைமையில், இந்நிகழ்ச்சி, இப்பள்ளியில் ஆகஸ்ட் 12 முதல் 14, 2026 வரை நடைபெறுகிறது. 

ஆகஸ்ட் 15, 2026 அன்று காலை 8 மணிக்கு நடைபெறும் நிறைவு விழா மற்றும் சுதந்திர தினக் கொண்டாட்டத்திற்கு, தமிழ்நாடு நகர்ப்புற நிதி மற்றும் உள்கட்டமைப்பு மேம்பாட்டுக் கழகத்தின் (TUFIDCO) நிர்வாக இயக்குநர் திருமதி கவிதா ராமு, இ.ஆ.ப., தலைமை வகிக்கிறார். மூன்று நாள் நடைபெறும் இந்தப் பண்பாட்டு நிகழ்ச்சியில் கேலிச் சித்திரம் வரைதல், நாட்டுப்புற நடனம், களிமண் சிற்பக்கலை, மௌன நாடகம் மற்றும் பாரம்பரிய நாட்டுப்புறக் கலை நிகழ்ச்சிகள் இடம் பெறுகின்றன. இதன் மூலம் படைப்பாற்றல், சுய வெளிப்பாடு மற்றும் பண்பாட்டு கற்றலுக்கான உள்ளடக்கிய தளம் உருவாக்கப்பட்டுள்ளது.

டாக்டர் எம்.ஜி.ஆர். இல்லம் மற்றும் செவித்திறன் மற்றும் பேச்சுத்திறன் குறைபாடுள்ள குழந்தைகளுக்கான மேல்நிலைப் பள்ளியின் நிறுவன முதல்வரும், இயக்குநருமாகிய டாக்டர் லதா ராஜேந்திரன் கூறுகையில், “எங்கள் குழந்தைகளுக்கு கலை மற்றும் பண்பாடு என்பது வெறும் செயல்பாடுகள் மட்டுமல்ல; அவை வெளிப்பாடு, தன்னம்பிக்கை மற்றும் தொடர்பை வளர்ப்பதற்கான சக்திவாய்ந்த வழிகளாகும். இந்த மூன்று நாள் நிகழ்ச்சி, அவர்களின் படைப்பாற்றலை ஆராயவும், பல்வேறு கலை வடிவங்களில் பங்கேற்கவும், நமது பண்பாட்டு பாரம்பரியத்தின் செழுமையை உள்ளடக்கிய மற்றும் மகிழ்ச்சியான சூழலில் அனுபவிக்கவும் வாய்ப்பளிக்கிறது. இந்தத் தளத்தை உருவாக்கி, எங்கள் பள்ளிக்கு இத்தகைய வளமான அனுபவங்களை கொண்டு வந்த தென்மண்டல பண்பாட்டு மையத்திற்கு எங்களது நன்றியைத் தெரிவித்துக் கொள்கிறோம். ஒவ்வொரு குழந்தைக்கும் தனித்துவமான திறமையை உருவாக்கவும், தொடர்பு கொள்ளவும், சிறந்து விளங்கவும் முடியும். இதுபோன்ற நிகழ்ச்சிகள் அவர்களின் திறமைகளை கண்டறிந்து, அவற்றை கொண்டாட உதவுகின்றன,” என்றார்.

இந்த முயற்சியானது, இந்தியாவின் செழுமையான பண்பாட்டு பாரம்பரியத்தை பல்வேறு சமூகத்தினருக்கும் கொண்டு சேர்ப்பதிலும், செவித்திறன் மற்றும் பேச்சுத்திறன் குறைபாடுள்ள குழந்தைகள் கலை மற்றும் பண்பாட்டை அனுபவித்து, கற்று, அதில் பங்கேற்பதற்கான வாய்ப்புகளை உருவாக்குவதிலும் தென்மண்டல பண்பாட்டு மையத்தின் உறுதிப்பாட்டை வெளிப்படுத்துகிறது. குழந்தைகளின் திறமைகளையும் ஆற்றலையும் கொண்டாடும் இந்த நிகழ்ச்சி, ஒவ்வொரு குழந்தைக்கும் கலை மற்றும் பண்பாட்டின் மூலம் பங்கேற்கவும், தங்களது திறமைகளை வெளிப்படுத்தவும், தன்னம்பிக்கையுடன் சிறந்து விளங்கவும் வாய்ப்பு வழங்கப்பட வேண்டும் என்ற செய்தியையும் வலியுறுத்துகிறது.

நிகழ்ச்சி அட்டவணை

ஆகஸ்ட் 12, 2026 – கேலிச் சித்திரம் வரைதல் பயிலரங்கு மற்றும் புதுச்சேரி நாட்டுப்புறக் கலை நிகழ்ச்சி

ஆகஸ்ட் 13, 2026 – நாட்டுப்புற நடனப் பயிற்சி பயிலரங்கு மற்றும் தமிழ்நாடு நாட்டுப்புற நடன நிகழ்ச்சி

ஆகஸ்ட் 14, 2026 – களிமண் சிற்பக் கலை பயிலரங்கு மற்றும் மௌனநாடக நிகழ்ச்சி

தொடக்க நாளில், புதுச்சேரியைச் சேர்ந்த நாட்டுப்புறக் கலைப் பயிற்சியாளர்களான திரு. ராஜன் மற்றும் அவரது குழுவினரால் சிறப்பு நாட்டுப்புறக் கலைப் பயிற்சி நிகழ்ச்சி நடத்தப்பட்டது. குழந்தைகள் தலா ஐந்து பேர் கொண்ட குழுக்களாகப் பிரிக்கப்பட்டு, அவர்களுக்கு பல்வேறு பாரம்பரிய நாட்டுப்புறக் கலை வடிவங்கள் குறித்த செய்முறைப் பயிற்சி அளிக்கப்பட்டது. இதன் மூலம் குழந்தைகள் ஆர்வத்துடன் கற்றுக்கொண்டு, நேரடியாகப் பங்கேற்கும் வாய்ப்பைப் பெற்றனர். மேலும், கேரள மாநிலம் ஆலப்புழாவைச் சேர்ந்த செவித்திறன் குறைபாடுள்ள கலைஞர் திருமதி காவ்யா எஸ். நாத் வரைந்த ஓவியங்களின் கண்காட்சியும் பள்ளி அரங்கில் நடைபெற்றது. இந்தக் கண்காட்சி மூன்று நாட்களும் தொடர்ந்து நடைபெறும். இதன் மூலம் மாணவர்கள் அவரது கலைப் படைப்புகளைப் பார்வையிடவும், அவருடன் கலந்துரையாடவும், அவரது கலைப் பயணத்திலிருந்து உத்வேகம் பெறவும் வாய்ப்பு கிடைக்கும். மூன்று நாட்களும் திருமதி நாத் பள்ளியில் மாணவர்களுடன் கலந்துரையாடி, கலைஞராக தனது அனுபவங்களைப் பகிர்ந்து கொள்ள உள்ளார்.