அன்பில் மகேஸ் ரூ.10 கோடி மான நஷ்ட ஈடு நோட்டீஸ்

ஜூனியர் விகடனுக்கு முன்னாள் அமைச்சர் அன்பில் மகேஸ் பொய்யாமொழி ரூ.10 கோடி மான நஷ்ட ஈடு நோட்டீஸ் அனுப்பியுள்ளார்.

முன்னாள் பள்ளிக் கல்வித்துறை அமைச்சர் திரு.அன்பில் மகேஸ் பொய்யாமொழி குறித்து ஆதாரமற்ற, அவதூறு செய்தி வெளியிட்டதாக ‘ஜூனியர் விகடன்’ ஆசிரியர், வெளியீட்டாளர் உட்பட 12 பேருக்கு வழக்கறிஞர் மூலம் சட்டப்பூர்வ நோட்டீஸ் அனுப்பப்பட்டுள்ளது. 23.09.2026 நாளிட்ட ஜூனியர் விகடன் இதழில் "ரூ.1,000 கோடி முறைகேடு?", "சிக்கிய அன்பில்..." என அட்டைப்படக் கட்டுரை வெளியிட்டு, அவதூறான சித்திரங்களுடன் நற்பெயருக்குக் களங்கம் ஏற்படுத்தியுள்ளனர். பி.டி.அரசகுமார் மீதான வழக்கில் அன்பில் மகேஸுக்கு எவ்விதத் தொடர்பும் இல்லை; மத்திய குற்றப்பிரிவு(CCB) எஃப்.ஐ.ஆரிலும் இவரது பெயர் இல்லை. மேலும், அடிப்படை விளக்கம் எதுவும் கேட்காமல் உள்நோக்கத்துடன் இக்கட்டுரை வெளியிடப்பட்டுள்ளது.  

48 மணி நேரத்திற்குள் இணையதளத்திலுள்ள அவதூறுக் கட்டுரையை நீக்கி, பத்திரிகை விற்பனையை உடனடியாக நிறுத்த வேண்டும். முக்கிய நாளிதழ்கள் மற்றும் தொலைக்காட்சிகளில் நிபந்தனையற்ற மன்னிப்பு கேட்க வேண்டும். நற்பெயருக்கு ஏற்பட்ட பாதிப்பிற்கு ரூ.10 கோடி நஷ்ட ஈடு வழங்க வேண்டும். 48 மணி நேரத்திற்குள் இதற்கு உடன்படாவிடில் குற்றவியல் மற்றும் உரிமையியல் வழக்குகள் தொடரப்படும் என சட்டப்பூர்வ நோட்டீஸில் தெரிவிக்கப்பட்டுள்ளது.