ரீல்ஸ் மோகத்தால் விபரீதம்: எக்ஸ்பிரஸ் ரயிலைச் சிவப்பு விளக்கு காட்டி நிறுத்திய +2 மாணவர்கள்!

கேரள மாநிலம் கண்ணூர் அருகே நேற்று அதிகாலை ஒரு திடுக்கிடும் சம்பவம் நிகழ்ந்தது. எர்ணாகுளத்தில் இருந்து புனே நோக்கி 'ஓகா எக்ஸ்பிரஸ்' (Okha Express) ரயில் கண்ணூர் மாவட்டம் தலைச்சேரி மற்றும் மாகி இடையே தண்டவாளத்தில் வந்து கொண்டிருந்தது. அப்போது தண்டவாளத்தின் ஓரமாக நின்றிருந்த இருவர், ரயிலை நோக்கி திடீரென சிவப்பு விளக்கை (Red Light) காட்டியுள்ளனர். வழக்கமாக தண்டவாளத்தில் சிவப்பு விளக்கு காட்டப்பட்டால் ஏதோ ஆபத்து என்று பொருள் என்பதால், அதிர்ச்சியடைந்த இன்ஜின் டிரைவர் ரயிலை உடனடியாக அவசர கால பிரேக் போட்டு நிறுத்தினார்.

நடுவழியில் ரயில் நின்றவுடன், ஏதோ அசம்பாவிதம் நிகழ்ந்துவிட்டதோ எனப் பயணிகள் அனைவரும் பெரும் பரபரப்புக்கு உள்ளானார்கள். இன்ஜின் டிரைவர் கீழே இறங்கிச் சென்று பார்த்தபோது, ரயிலை நிறுத்தியது இரண்டு சிறுவர்கள் என்பது தெரியவந்தது. ரயிலை எதற்காக நிறுத்தினார்கள் என்று விசாரித்தபோது, அவர்கள் சொன்ன காரணம் அங்கிருந்த அதிகாரிகளை அதிர்ச்சியில் ஆழ்த்தியது. சமூக வலைதளங்களில் 'ரீல்ஸ்' (Reels) வீடியோ எடுப்பதற்காக, ரயிலைச் சிவப்பு விளக்கு காட்டி நிறுத்தி அதை வீடியோவாகப் பதிவு செய்ததாக அவர்கள் அலட்சியமாகத் தெரிவித்தனர்.

தகவலறிந்த கண்ணூர் ரயில்வே பாதுகாப்புப் படை (RPF) போலீசார், சம்பவ இடத்திற்கு விரைந்து வந்து அந்த இரண்டு மாணவர்களையும் பிடித்து விசாரணை நடத்தினர். விசாரணையில் அவர்கள் இருவரும் அப்பகுதியில் உள்ள பள்ளியில் 12-ஆம் வகுப்பு படித்து வரும் மாணவர்கள் என்பது உறுதி செய்யப்பட்டது. ஒரு சிறு விளையாட்டுக்காக நாட்டின் மிக முக்கியமான போக்குவரத்துச் சேவையைத் தடுத்து நிறுத்திய அவர்களின் செயல் சட்டப்படி கடும் தண்டனைக்குரியது என்றாலும், அவர்களின் எதிர்காலத்தைக் கருத்தில் கொண்டு போலீசார் எச்சரிக்கை விடுத்தனர்.

இனிமேல் இதுபோன்ற ஆபத்தான மற்றும் பொதுமக்களுக்கு இடையூறு விளைவிக்கும் செயல்களில் ஈடுபடக்கூடாது என்று அறிவுறுத்திய போலீசார், மாணவர்களின் பெற்றோர்களை வரவழைத்துக் கண்டித்து அனுப்பி வைத்தனர். ஒரு சில வினாடி சமூக வலைதளப் புகழுக்காக, ஆயிரக்கணக்கான பயணிகளின் பாதுகாப்பை அடகு வைக்கும் இதுபோன்ற செயல்கள் அண்மைக்காலமாக அதிகரித்து வருவது ரயில்வே அதிகாரிகளிடையே பெரும் கவலையை ஏற்படுத்தியுள்ளது.