கேரள மாநிலம் கண்ணூர் மாவட்டம் தவக்காரா பகுதியில் தனியார் கல்வி நிறுவனத்தில் பி.எஸ்சி. படித்து வரும் இரு மாணவிகள் சாலையை கடக்க முயன்றபோது, அதிவேகமாக வந்த தனியார் பேருந்து பயங்கரமாக மோதியது. இதில் இருவரும் படுகாயமடைந்து, கவலைக்கிடமான நிலையில் மருத்துவமனையில் தீவிர சிகிச்சை பெற்று வருகின்றனர். இது தொடர்பான சிசிடிவி காட்சி வெளியாகி அதிர்ச்சியை ஏற்படுத்தியுள்ளது. 

பானாட்டைச் சேர்ந்த ஆவணி மற்றும் செருபரம்பைச் சேர்ந்த சினேகா ஆகியோரே விபத்தில் காயமடைந்தவர்கள் ஆவர். கண்ணூரில் உள்ள தனியார் கல்வி நிறுவனத்தில் பி.எஸ்சி (B.Sc) பயின்று வரும் இவர்கள் இருவரும், விபத்து நடந்த உடனடியாக அருகே உள்ள தனியார் மருத்துவமனையில் அனுமதிக்கப்பட்டனர்.

கண்ணூர் - வடகரை வழித்தடத்தில் இயங்கும் 'ஐவான்' (Eye One) என்ற தனியார் பேருந்தே இந்த விபத்தை ஏற்படுத்தியுள்ளது. பேருந்து மிக அதிவேகமாக வந்ததே விபத்துக்குக் காரணம் என சம்பவ இடத்தில் இருந்த பொதுமக்களும் காவல்துறையினரும் உறுதிப்படுத்தியுள்ளனர்.

இச்சம்பவம் தொடர்பாக பேருந்து ஓட்டுநர் ஆதர்ஷ் மற்றும் நடத்துநரை கண்ணூர் காவல்துறையினர் கைது செய்து விசாரணை நடத்தி வருகின்றனர். ஓட்டுநரின் அதிவேகமும் கவனக்குறைவான ஓட்டுதலுமே விபத்திற்குக் காரணம் என முதற்கட்ட விசாரணையில் தெரியவந்துள்ளது.

மேலும், விபத்தை ஏற்படுத்திய தனியார் பேருந்தை காவல்துறையினர் பறிமுதல் செய்து காவல் நிலையத்திற்கு கொண்டு சென்றனர்.

<a style="border: 0px; overflow: hidden" href=https://youtube.com/embed/LCweSPBOlqo?autoplay=1&mute=1><img src=https://img.youtube.com/vi/LCweSPBOlqo/hqdefault.jpg alt=""><span><div class="youtube_play"></div></span></a>" style="border: 0px; overflow: hidden;" width="640">