தலா 2 வீரர்கள் பரிமாற்றம்... சிஎஸ்கே- எஸ்ஆர்ஹெச் ரகசிய ஒப்பந்தம்

சென்னை சூப்பர் கிங்ஸ் (சிஎஸ்கே) மற்றும் சன்ரைசர்ஸ் ஹைதராபாத் (எஸ்ஆர்எச்) அணிகளுக்கு இடையே நான்கு வீரர்களைக் கொண்ட பரிமாற்ற ஒப்பந்தம் இறுதி செய்யப்பட்டுள்ளது. இதன்படி இங்கிலாந்து அதிரடி ஆட்டக்காரர் லியாம் லிவிங்ஸ்டோன் மற்றும் ஜாக் எட்வர்ட்ஸ் ஆகியோர் சிஎஸ்கே அணியில் இணைய உள்ளனர். மறுபுறம் வேகப்பந்து வீச்சாளர்களான கலீல் அகமது மற்றும் நாதன் எல்லிஸ் ஆகியோர் எஸ்ஆர்எச் அணிக்குச் செல்கின்றனர். இந்த வீரர்கள் பரிமாற்றத்தை இந்திய கிரிக்கெட் கட்டுப்பாட்டு வாரியம் (பிசிசிஐ) நவம்பர் 5ஆம் தேதி அதிகாரப்பூர்வமாக உறுதிப்படுத்தியுள்ளது.

லியாம் லிவிங்ஸ்டோன் தற்போது ரூ. 6 கோடி ஒப்பந்தத் தொகையில் சிஎஸ்கே அணியில் இணையவுள்ளார். 2025ஆம் ஆண்டு ஐபிஎல் மினி ஏலத்தில் எஸ்ஆர்எச் அணி அவரை ரூ. 13 கோடிக்கு வாங்கியிருந்தது குறிப்பிடத்தக்கது. தற்போது குறைக்கப்பட்ட தொகையில் அவர் சிஎஸ்கே அணிக்காக விளையாட உள்ளார். மற்றொரு வீரரான ஜாக் எட்வர்ட்ஸ், தனது தற்போதைய ரூ. 3 கோடி ஒப்பந்தத் தொகையிலேயே சிஎஸ்கே அணிக்கு மாறுகிறார். 2025ஆம் ஆண்டு ஐபிஎல் தொடரில் ராயல் சேலஞ்சர்ஸ் பெங்களூரு (ஆர்சிபி) அணியுடன் சாம்பியன் பட்டம் வென்ற லிவிங்ஸ்டோன், அதன் பின்னர் எஸ்ஆர்எச் அணிக்காக இரண்டு போட்டிகளில் மட்டுமே விளையாடினார். அதேபோல் ஜாக் எட்வர்ட்ஸுக்கு 2026ஆம் ஆண்டு ஐபிஎல் தொடரில் விளையாடும் வாய்ப்பு கிடைக்கவில்லை.

எஸ்ஆர்எச் அணிக்குச் செல்லும் கலீல் அகமது, நாதன் எல்லிஸ்!

இந்தப் பரிமாற்றத்தின் மூலம் எஸ்ஆர்எச் அணியில் இணையவுள்ள இருவரும் வேகப்பந்து வீச்சாளர்கள். கடந்த சீசனில் காயம் காரணமாக இருவரின் ஆட்டமும் பாதிக்கப்பட்டது. மதீஷா பதிரானாவுக்குப் பதிலாக சிஎஸ்கே அணியின் இறுதிக்கட்ட ஓவர் பந்துவீச்சுப் பொறுப்பை ஏற்க நாதன் எல்லிஸ் தேர்வு செய்யப்பட்டிருந்தார். ரூ. 2 கோடிக்கு சிஎஸ்கே அணியால் வாங்கப்பட்ட அவர், ஐபிஎல் தொடங்குவதற்கு முன்பு நடைபெற்ற உள்நாட்டு ஒருநாள் கோப்பை இறுதிப்போட்டியில் தொடைத் தசைக் காயத்தால் பாதிக்கப்பட்டு முழு தொடரிலிருந்தும் விலகினார். இதையடுத்து அவருக்குப் பதிலாக ஸ்பென்சர் ஜான்சன் அணியில் சேர்க்கப்பட்டார்.

மற்றொரு வீரரான கலீல் அகமது, சிஎஸ்கே அணிக்காக ஐந்து போட்டிகளில் விளையாடிய நிலையில், தொடையின் முன்பகுதித் தசையில் ஏற்பட்ட காயம் காரணமாகத் தொடரிலிருந்து விலகினார். தற்போது மீண்டும் எஸ்ஆர்எச் அணிக்குத் திரும்பும் கலீல் அகமது, ஏற்கனவே 2018 முதல் 2021 வரை அந்த அணிக்காக விளையாடிய அனுபவம் கொண்டவர். இந்த வீரர்கள் பரிமாற்றம் இரு அணிகளின் அடுத்த ஐபிஎல் சீசனுக்கான அணித் திட்டங்களில் முக்கிய மாற்றத்தை ஏற்படுத்தும் என எதிர்பார்க்கப்படுகிறது.