நிசர்கா சூறாவளி: மும்பைக்கு அருகே அலிபாக் நகரில் நிலச்சரிவு ஏற்பட வாய்ப்பு !

கடுமையான சூறாவளி புயல் ‘நிசர்கா’ மும்பை மற்றும் மகாராஷ்டிராவின் வடக்கு கடற்கரை நோக்கி 110 கி.மீ வேகத்தில் நகர்கிறது. ஏற்கனவே கொரோனா வைரஸ் வெடித்ததால் இந்தியாவின் மும்பை நகருக்கு ரெட் அலர்ட் விடுக்கப்பட்டது. தற்போது ஒரு நூற்றாண்டில் மும்பை கடற்கரைக்கு வரும் இரண்டாவது சூறாவளி நிசர்கா என்பதால் மீண்டும் ரெட் அலர்ட் விடுக்கப்பட்டது.

நிசர்கா சூறாவளி மதியம் மகாராஷ்டிராவின் ராய்காட் மாவட்டத்தில் அலிபாக் நகரை கடக்கும் என இந்திய வானிலை ஆய்வு மையம் தெரிவித்துள்ளது. அதிகபட்சமாக 120 கிமீ வேகத்தில் காற்று வீசும். புயலுடன் சுமார் மூன்று முதல் 6.5 அடி வரை கடல் அலைகள் எழும்பும் என இந்திய வானிலை மையம் எச்சரிக்கை விடுத்துள்ளது.

சூறாவளி புயலைக் கருத்தில் கொண்டு மும்பை சர்வதேச விமான நிலையத்திலிருந்து பல விமானங்கள் ரத்து செய்யப்பட்டுள்ளன.

மகாராஷ்டிரா மற்றும் குஜராத் மாநிலங்களில் பாதிக்கப்படக்கூடிய பகுதிகளில் தேசிய பேரிடர் மீட்புக்குழுவினர் 30 குழுக்கள் நிறுத்தப்பட்டுள்ளன. மும்பை, புனே, பால்கர், தானே, நாசிக், ராய்காட், துலே மற்றும் நந்தூர்பார் ஆகிய இடங்களில் மிக அதிக மழை பெய்யும் என்று எதிர்பார்க்கப்படுகிறது.

தெற்கு குஜராத்தின் வல்சாத் மற்றும் நவ்சரி கடற்கரைக்கு அருகிலுள்ள 47 க்கும் மேற்பட்ட கிராமங்களில் இருந்து குறைந்தது 20,000 பேர் வெளியேற்றப்பட்டனர். இதற்கிடையில், சூரத், பருச், மற்றும் சவுராஷ்டிராவின் பாவ்நகர் மற்றும் அம்ரேலி மாவட்டங்களும் அதிக எச்சரிக்கையுடன் வைக்கப்பட்டுள்ளன.

நேற்று மாலை, பிரதமர் நரேந்திர மோடி மகாராஷ்டிராவின் உத்தவ் தாக்கரே மற்றும் குஜராத்தின் விஜய் ரூபானி ஆகிய இரு முதல்வர்களிடம் பேசினார், மேலும் அவர்களுக்கு மையத்தின் அனைத்து உதவிகளையும் உறுதி செய்தார்