வெறும் சில்லறை தகராறு.. பேருந்தில் இருந்து தள்ளிவிடப்பட்ட பெண் நடத்துனர் பரிதாப மரணம்
தெலங்கானாவில் டிக்கெட் கட்டணம் மற்றும் சில்லறை தொடர்பாக ஏற்பட்ட வாக்குவாதத்தில் ஓடும் அரசுப் பேருந்தில் இருந்து பெண் பயணியால் கீழே தள்ளிவிடப்பட்ட 24 வயது நடத்துனர் பலியான சம்பவம் அதிர்ச்சியை ஏற்படுத்தியுள்ளது.
பத்ராத்ரி கோத்தகூடம் மாவட்டத்தில், பயணச்சீட்டுக்கான சில்லறைப் பணம் தொடர்பாக ஏற்பட்ட வாக்குவாதத்தின்போது, ஒரு பெண் பயணியால் ஓடும் பேருந்திலிருந்து தள்ளிவிடப்பட்டதாகக் கூறப்படும் 24 வயதான தெலங்கானா மாநில சாலைப் போக்குவரத்துக் கழக (TGSRTC) பெண் நடத்துநர், செவ்வாய்க்கிழமை இரவு உயிரிழந்தார். பாதிக்கப்பட்டவரான குண்ட்லா பிரவலிகா, மானுகுரு ஆர்.டி.சி பணிமனையில் பணியாற்றி வந்தார். இவர் மானுகுரு நகரிலுள்ள ஆதர்ஷ் நகரைச் சேர்ந்தவர். அக்டோபர் 25 அன்று, அஸ்வபுரம் மண்டலத்திலுள்ள மிட்டகுடம் அருகே, அவர் மானுகுருவிலிருந்து பத்ராச்சலம் நோக்கிச் செல்லும் பேருந்தில் பயணம் செய்துகொண்டிருந்தபோது இந்தச் சம்பவம் நிகழ்ந்துள்ளது.
விசாரணையின்படி, பனோத் மௌனிகா என்ற பயணி, தனது மகனுடன் பேருந்தில் ஏறி, அவனது பயணச்சீட்டுக்காக பிரவலிகாவிடம் 100 ரூபாய் நோட்டைக் கொடுத்துள்ளார். நடத்துநர் 10 ரூபாய்க்கான பயணச்சீட்டை வழங்கியதோடு, சில்லறை இல்லாததைக் காரணம் காட்டி, மீதமுள்ள 90 ரூபாயை பயணச்சீட்டில் குறித்து, பயணியை பின்னர் பெற்றுக்கொள்ளுமாறு கூறியுள்ளார். பேருந்து அவரது நிறுத்தத்தை நெருங்கியபோது, மௌனிகா மீதிப் பணத்தைக் கேட்டதால் வாக்குவாதம் முற்றியுள்ளது. அதைத் தொடர்ந்து நடந்த மோதலின் போது, அவர் பிரவலிகாவை ஓடிக்கொண்டிருந்த பேருந்தின் கதவு வழியாக வெளியே தள்ளியதாகக் கூறப்படுகிறது. நடத்துனர் சாலையில் விழுந்ததில், பேருந்தின் பின் சக்கரங்கள் அவரது கால்கள் மீது ஏறிச் சென்றதில், அவருக்குப் பலத்த காயங்கள் ஏற்பட்டன.
பிரவலிகா முதலில் பத்ராசலத்தில் உள்ள ஒரு மருத்துவமனைக்கும், பின்னர் மேல் சிகிச்சைக்காக ஹைதராபாத்தில் உள்ள ஒரு தனியார் மருத்துவமனையிலும் அனுமதிக்கப்பட்டார். பத்து நாட்கள் சிகிச்சை அளிக்கப்பட்ட போதிலும், அவர் செவ்வாய்க்கிழமை இரவு சிகிச்சை பலனின்றி உயிரிழந்தார். இச்சம்பவம் தொடர்பாக அஸ்வபுரம் போலீசார் வழக்குப் பதிவு செய்து மௌனிகாவைக் கைது செய்து நீதிமன்றத்தில் ஆஜர்படுத்தினர். பிரவலிகாவின் குடும்பத்திற்கு
அரசும் ஆர்.டி.சி-யும் ரூ.10 லட்சம் கருணைத் தொகையை வழங்கியுள்ளன.