சார்லி சாப்ளின் -2 எப்போது ரிலீஸ்: இயக்குனர் தகவல்

பிரபு தேவா நடிப்பில் உருவாகியுள்ள ’சார்லி சாப்ளின் -2’ திரைப்படத்தின் ரிலீஸ் குறித்த தகவலை இயக்குனர் ஷக்தி சிதம்பரம் வெளியிட்டுள்ளார்

சென்னை: பிரபு தேவா நடிப்பில் உருவாகியுள்ள ’சார்லி சாப்ளின் -2’ திரைப்படத்தின் ரிலீஸ் குறித்த தகவலை இயக்குனர் ஷக்தி சிதம்பரம் வெளியிட்டுள்ளார்.

அம்மா கிரியேசன்ஸ் பட நிறுவனம் அதிக பொருட்செலவில் தயாரித்துள்ள படம் “சார்லி சாப்ளின் 2” இந்த படத்தின் முதல் பாகமான சார்லி சாப்ளின் தமிழ், தெலுங்கு,மலையாளம், கன்னடம், ஹிந்தி மற்றும் பெங்காலி மற்றும் ஒரியா உட்பட இந்திய மொழிகள் பலவற்றில் ரீமேக் செய்யப்பட்டு வசூல் சாதனை படைத்தது.

முதல் பாகத்தின் ஹீரோவான பிரபுதேவாவே இதிலும் நாயகனாக நடிக்கிறார். கதாநாயகியாக நிக்கி கல்ராணி நடிக்கிறார். இன்னொரு நாயகியாக அதா சர்மா நடிக்கிறார். ஷக்தி சிதம்பரம் இயக்கும் இப்படத்திற்கு அம்ரீஷ் இசையமைக்கிறார். முதல் பாகத்தில் நடித்த பிரபு இரண்டாம் பாகத்திலும் முக்கிய வேடத்தில் நடிக்கிறார். சந்தனா, அரவிந்த் ஆகாஷ், விவேக் பிரசன்னா, ரவிமரியா, தேவ்கில், சமீர் கோச்சார் ஆகியோர் நடிக்கிறார்கள்.

இப்படம் குறித்து இயக்குனர் ஷக்தி சிதம்பரம் கூறியதாவது: என் படங்களில் காமெடியும் கமர்ஷியலும் கொஞ்சம்  கூடுதலாக இருக்கும். சார்லி சாப்ளின் முதல் பாகத்தில் இதெல்லாம் இருந்ததால் தான் படம் எல்லா மொழிகளிலும் அமோக வெற்றி பெற்றது. 16 வருடங்களுக்கு பிறகு அதே டைட்டிலில் இரண்டாம் பாகம் உருவாகி உள்ளது. பிரபு தேவா மேட்ரிமோனியல் நிறுவனம் நடத்தும் வேடத்தில் நடிக்கிறார். நிக்கி கல்ராணி சமூக ஆர்வலராக நடிக்கிறார். பிரபு டாக்டராகவும் அதா சர்மா மனோதத்துவ நிபுனராகவும் நடிக்கிறார்கள். படத்தில் இடம் பெற்றுள்ள கிராமப்புற பாடகர்கள் செந்தில் கணேஷ் – ராஜலட்சுமி பாடிய சின்ன மச்சான் செவத்த மச்சான் பாடல் யூடியூப்பில் 7.5 கோடி பார்வையாளர்களால் பார்க்கப்பட்டுள்ளது. லட்சக் கணக்கில் டப் மேஷ் உருவாக்கப் பட்டு சாதனை படைத்திருக்கிறது என்பதும் குறிப்பிடத்தக்கது. படப்பிடிப்பு கோவா, கும்பகோணம், சென்னை போன்ற இடங்களில் நடைபெற்றுள்ளது. இம்மாதம் 25 ம் தேதி படம் வெளியாகும் என்று தெரிவித்துள்ளார்.