“தேர்தல் களத்திற்கு தயாராகிவரும் அ.தி.மு.க.” : அறிக்கை தயாரிப்பு குழு நியமனம்!
2021 ஆம் ஆண்டு சட்டப்பேரவை தேர்தலை எதிர்கொள்ள அதிமுக 11 பேர் கொண்ட அறிக்கை குழு உட்பட 5 தேர்தல் குழுக்களை உருவாக்கியுள்ளது.
சட்டமன்ற தேர்தலுக்காக அதிமுக சார்பில் 11 பேர் கொண்ட அறிக்கை தயாரிப்பு குழு நியமிக்கப்பட்டுள்ளது.
அத்துடன் 3 பேர் கொண்ட தேர்தல் பரப்புரை குழு , செய்தியாளர்கள் சந்திப்புகளுக்கு 7 பேர் கொண்ட குழு, எதிர்க்கட்சிகளின் புகார்களுக்கு பதிலளிக்க 9 பேர் கொண்ட குழு, 3 பேர் கொண்ட ஊடக ஒருங்கிணைப்பு குழு போன்றவை நியமிக்கப்பட்டுள்ளது.
அக்கட்சியின் ஒருங்கிணைப்பாளர் மற்றும் துணை ஒருங்கிணைப்பாளர் ஆகியோர் கூட்டாக வெளியிட்ட அறிக்கையில், இதை தெரிவித்துள்ளனர்.
தேர்தல் பிரச்சாரக் குழுவில் எம்.பி. தம்பிதுரை, வைகைச் செல்வன், கொள்கை பரப்பு துணைச் செயலாளர் இளங்கோவன் ஆகியோர் இடம்பெற்றுள்ளனர். அதேபோல் ஊடகவியலாளர்கள்/ செய்தியாளர்கள் சந்திப்பில் அமைச்சர் தங்கமணி, அமைச்சர் ஜெயக்குமார் ,அமைச்சர் காமராஜ் ,அமைச்சர் ஆர்.பி. உதயகுமார், அமைச்சர் பாண்டியராஜன், வைகைச்செல்வன் மற்றும் சட்டமன்ற உறுப்பினர் பரமசிவம் ஆகியோர் இடம்பெற்றுள்ளனர்.
அத்துடன் தேர்தல் சம்பத்தப்பட்ட பணிகளுக்காக அனைத்து தொகுதிகளையும் 30 மண்டலங்களாக பிரித்து அதற்கு பொறுப்பாளர்களாக மூத்த தலைவர்களையும், அமைச்சர்களையும் அதிமுக தலைமைக்கழகம் நியமித்துள்ளது.