திருப்பூர் மதுபானக் கூடங்களில் முறைகேடாக மதுபாட்டில்கள் பதுக்கல் – 6 பேர் கைது!

திருப்பூர்

திருப்பூரில் மதுபான கூடங்களில் முறைகேடாக பதுக்கி வைத்த ரூ.5 லட்சம் மதிப்பிலான 3,500 மதுபாட்டில்களை பறிமுதல் செய்த போலீசார், இதுதொடர்பாக கடை உரிமையாளர்கள் உள்பட 6 பேரை கைது செய்தனர்.

திருப்பூர் மாவட்டத்தில் கொரோனா பரவல் காரணமாக, மாவட்ட நிர்வாகம் அத்தியாவசிய பொருட்கள் தவிர்த்து, டாஸ்மாக் உள்ளிட்ட மற்ற கடைகள் மாலை 5 மணி வரை மட்டும் செயல்பட அனுமதி வழங்கி உள்ளது. எனினும், திருப்பூர் நகரில் பல்வேறு இடங்களில் அனுமதிக்கப்பட்ட நேரத்தை கூடுதல் நேரம் மதுபானங்கள் விற்பனை செய்யப்படுவதாக போலீசாருக்கு ரகசிய தகவல் கிடைத்தது.

அதன் பேரில், திருப்பூர் மாவட்ட டாஸ்மாக் மேலாளர் சௌந்தர பாண்டியன், கலால் உதவி ஆணையர் சுகுமார், அனுப்பர்பாளையம் போலீசார் பல்வேறு இடங்களில் சோதனையில் ஈடுபட்டனர். இந்த ஆய்வின்போது, திருப்பூர் காந்தி ரோடு பகுதியில் எதிரெதிரே உள்ள 2 மதுபானக் கூடங்கள் மற்றும் கூலிபாளையம் சாலை பகுதியில் உள்ள மதுபான கூடத்தில் ஆய்வில் பெட்டி, பெட்டியாக மதுபாட்டில்களை பதுக்கி கூடுதல் விலைக்கு விற்பனை செய்தது தெரிய வந்தது.

இதனை அடுத்து, 3 கடைகளிலும் இருந்து ரூ.5 லட்சம் மதிப்பிலான 3 ஆயிரத்து 500 மதுபாட்டில்களை பறிமுதல் செய்தனர். மேலும், இதுதொடர்பாக மதுபானக்கூட உரிமையாளர்கள் மகாலிங்கம், தனபால் மற்றும் மதுபான கூடத்தில் பணிபுரிந்த ஊழியர்கள் 4 பேர் என மொத்தம் 6 பேர் மீது அனுப்பர் பாளையம் போலீசார் வழக்குப்பதிவு செய்து, கைதுசெய்தனர்.