கோவை மாவட்டம் துடியலூர் அருகே கஞ்சா விற்பனையில் ஈடுபட்ட கேரளாவை சேர்ந்த 2 பேரை தனிப்படை போலீசார் கைதுசெய்தனர். துடியலூர் அடுத்த தடாகம் பகுதியில் ஆய்வாளர் பாலமுரளி சுந்தரம் தலைமையில் தனிப்படை போலீசார் ரோந்து பணியில் ஈடுபட்டிருந்தனர்.
அப்போது, சுடுகாடு அருகே சந்தேகத்திற்கு இடமான வகையில் நின்ற கேரள பதிவெண் கொண்ட இருசக்கர வாகனத்தை கண்ட தனிப்படை போலீசார், அங்கு நின்ற 2 பேரை பிடித்து விசாரித்தனர். அதில், அவர்கள் கேரள மாநிலம் கோட்டத்துறையை சேர்ந்த பாண்டியன்(31) மற்றும் அரவிந்த்(19) என்பது தெரியவந்தது. மேலும், அவர்கள் சுமார் 2 கிலோ அளவிலான கஞ்சாவை மறைத்து வைத்து விற்பனை செய்து வந்ததும் தெரியவந்தது. இதனையடுத்து இருவரையும் கைதுசெய்த போலீசார், அவர்களை காவலில் எடுத்து விசாரணை நடத்தி வருகின்றனர்.