தேர்தல் செலவுக்கு ஆதார் கார்டை வைத்து கொண்டு 50 லட்சம் லோன் கேட்ட சுயேட்சை வேட்பாளர்: ஆடிப்போன வங்கி ஊழியர்கள்!?

தேர்தல் செலவுகளுக்காக வேட்பாளர் ஒருவர்  வங்கியில் ஆதார் அட்டையை அடமானம் வைத்து 50 லட்சம் பணம் தருமாறு கேட்டுள்ளது அதிர்ச்சியை ஏற்படுத்தியுள்ளது.

நாமக்கல்: தேர்தல் செலவுகளுக்காக வேட்பாளர் ஒருவர்  வங்கியில் ஆதார் அட்டையை அடமானம் வைத்து 50 லட்சம் பணம் தருமாறு கேட்டுள்ளது அதிர்ச்சியை ஏற்படுத்தியுள்ளது.

மக்களவை தேர்தலையொட்டி கட்சிகள் வாக்குறுதிகளை அள்ளி வீசியும், மற்ற கட்சிகளை  விமர்சித்தும் தேர்தல் பிரசாரத்தில் தீவிரம் காட்டி வரும் நிலையில் சுயேட்சை வேட்பாளர்களோ நூதன முறையில் பிரசாரம் செய்து கவனம் பெற்று  வருகின்றனர். அதே சமயம் சுயேட்சை வேட்பாளர்கள் அளிக்கும் வாக்குறுதிகளும்  வினோதமாக இருக்கிறது.

அந்த வரிசையில்  மக்களவைத் தேர்தலில் அகிம்சா சோஷலிஸ்ட் என்ற கட்சி சார்பில்  ரமேஷ் என்பவர் நாமக்கல் தொகுதியில் போட்டியிடுகிறார். தற்போது ஓட்டு வேட்டையில் ஈடுபட்டு வரும் இவர்  கதராடை அணிந்து கொண்டு காந்தி தோற்றத்தில் வலம் வருகிறார். 

இந்நிலையில், நாமக்கல்லில் உள்ள அரசு வங்கி  ஒன்றிற்கு சென்ற இவர், அங்கிருந்த வங்கி அதிகாரிகளிடம் மனு ஒன்றை அளித்துள்ளார். அதில், ‘நான் காந்தியக் கொள்கைகளைத் தவறாமல் பின்பற்றுபவன். முழு நேர தொழிலாக விவசாயம் செய்வதோடு, யோகா ஆசிரியராகவும் இருக்கிறேன். நாமக்கல் தொகுதியில் போட்டியிடுகிறேன்.தேர்தலில் போட்டியிடுபவர் ரூ.70 லட்சம் வரை செலவு செய்ய தேர்தல் ஆணையம் அனுமதி அளித்துள்ளது. 

அதனால் தேர்தல் செலவுகளுக்காக  ரூ.50 லட்சம் தேவைப்படுகிறது. இந்த தொகையை வழங்கினால் தேர்தலில் வெற்றிபெற்று ஒரு பைசா கூட பாக்கி இல்லாமல் கடனை செலுத்தி விடுவேன். பணத்தை வாங்கி கொண்டு வெளிநாட்டுக்கு தப்பி விட மாட்டேன். என் பாஸ்போர்ட்டை  இதில் இணைத்துள்ளேன். அதனால் அரசு வழங்கிய ஆதார் அட்டையை அடையாளமாகக் கொண்டு எனக்கு 50 லட்சம் கடன் வழங்கக் கோருகிறேன்’என்று குறிப்பிட்டுள்ளார்.

பொதுவாக வீடு , தொழில், வாகனம், கல்வி உள்ளிட்ட சில காரணங்களுக்காக வங்கியில் கடன் அளிப்பது வழக்கம்.ஆனால்  தேர்தல் செலவுக்காகக் கடன் கேட்டிருப்பது சற்றே வித்தியாசமான அணுகுமுறையாகத் தான் உள்ளது. 

இன்னும் என்னென்ன கூத்தெல்லாம் நடக்க போகுதோ!?

இதையும் வாசிக்க: அஜீத் பாணியில் வெளிமாநிலங்களுக்கு ஷிஃப்ட் ஆகும் தளபதி 63