திருச்சியில் வ.உ.சி பேரவையினர் போராட்டத்தில் தள்ளுமுள்ளு – போலீசார் தடியடி

திருச்சி

திருச்சியில் தேவேந்திர குல வேளாளர் பொதுப்பெயர் பரிந்துரைக்கு எதிர்ப்பு தெரிவித்து, சாலை மறியலில் ஈடுபட்டவர்களை போலீசார் தடியடி நடத்தி, கைதுசெய்தனர்.பட்டியல் இனத்தை சேர்ந்த 7 உட்பிரிவுகளை, தேவந்திர குல வேளாளர் என்ற பொதுப்பெயரில் அழைக்கும் தமிழக அரசின் பரிந்துரைக்கு எதிர்ப்பு தெரிவித்து, இன்று திருச்சியில் வ.உ.சி பேரவை அமைப்பு சார்பில் கண்டன ஆர்ப்பாட்டம் நடைபெற்றது.

திருச்சி மத்திய பேருந்து நிலையம் அருகே நடந்த இந்த ஆர்ப்பாட்டத்தில் 500-க்கும் மேற்பட்டவர்கள் கலந்துகொண்டு, தமிழக அரசுக்கும், முதலமைச்சருக்கு எதிராகவும் கோஷங்களை எழுப்பினர். தொடர்ந்து, ஆர்ப்பாட்டக்காரர்கள் திடீரென சாலை மறியல் போராட்டத்தில் ஈடுபட்டதால், போக்குவரத்து பாதிக்கப்பட்டது.

இதனால் சாலை மறியலில் ஈடுபட்டவர்களை கைதுசெய்த போலீசார், அவர்களை வாகனங்களில் ஏற்ற முற்பட்டனர். அப்போது , இரு தரப்பினருக்கும் இடையே தள்ளுமுள்ளு ஏற்பட்ட நிலையில், போராட்டக்காரர்கள் வீசிய மதுபாட்டில் பட்டு காவலர் ஒருவர் காயமடைந்தார்.

இதனை அடுத்து, போராட்டத்தில் ஈடுபட்டவர்கள் மீது தடியடி நடத்தி கூட்டத்தை கலைத்த போலீசார், பின்னர் அவர்களை கைதுசெய்து அழைத்துச்சென்றனர். தடியடி காரணமாக திருச்சி மத்திய பேருந்து நிலையத்தில் பரபரப்பு ஏற்பட்டது.