திருப்பதியில் ஏழுமலையான்: தினமும் ஆன்லைனில் 3 ஆயிரம் தரிசன டிக்கெட்கள் விற்பனை

திருமலை: திருப்பதி ஏழுமலையானை தரிசிக்க தினமும் 3,000 பக்தர்களுக்கு ஆன்லைன் மூலம் தரிசன டிக்கெட் வழங்கப்பட உள்ளது.

திருப்பதி ஏழுமலையான் கோவிலில் ஜூன் 11-ஆம் தேதி முதல் பக்தர்கள் தரிசனம் செய்ய அனுமதி வழங்கப்பட்டுள்ளது. ஆனால் வழக்கமாக திருப்பதிக்கு வரும் கூட்டத்தில் கிட்டத்தட்ட 10-இல் ஒரு பகுதியினர் மட்டும், அதாவது சுமார் 6,000 முதல் 7,000 பக்தர்களுக்கு மட்டுமே ஒரு நாளைக்கு அனுமதிக்கப்படுவார்கள். ஒரு மணி நேரத்திற்கு சுமார் 500 பக்தர்கள் மட்டுமே ஏழுமலையானை தரிசிக்க அனுமதிக்கப்படுவார்கள்.

பக்தர்கள் தரிசனம் காலை 6:30 மணிக்கு தொடங்கி தினமும் இரவு 7:30 மணிக்கு முடிவடையும். 65 வயதுக்கு மேற்பட்ட மூத்த குடிமக்களும், 10 வயதுக்குக் குறைவான குழந்தைகளும் திருப்பதி ஏழுமலையான் கோவிலில் அனுமதிக்கப்படுவதில்லை. கொரோனா கட்டுப்பாட்டு மண்டலங்களைச் சேர்ந்தவர்களும் திருப்பதி ஏழுமலையான் கோவிலுக்கு வருவதற்கு தடை விதிக்கப்பட்டுள்ளது.

திருப்பதி ஏழுமலையானை தரிசிக்க தினமும் 3,000 தரிசன டோக்கன்கள் ஆன்லைனில் முன்பதிவுக்காக வெளியிடப்படும். மேலும், 3000 ஆஃப்லைன் டிக்கெட்டுகள் மலையின் நுழைவாயிலான அலிபிரி சோதனைச் சாவடியில் உள்ள கவுண்டர்களில் வழங்கப்படும். ஜூன் மாதத்திற்கான ஆன்லைன் டிக்கெட்டுகள் ஜூன் 8-ஆம் தேதி வெளியிடப்படும்.

திருப்பதி கோவிலுக்கு வரும் ஒவ்வொரு பக்தரும் கொரோனா பரவலை தடுக்கும் விதமாக வெப்பத் திரையிடலுக்கு உட்படுத்தப்படுவார்கள். பக்தர்கள் முகக் கவசம் அணிந்து, இரண்டு நபர்களுக்கு இடையில் ஆறு அடி தூரம் இடைவெளி விட்டு இருப்பது கட்டாயமாகும். விஐபிகளுக்கு தினமும் காலை 6:30 மணி முதல் ஒரு மணி நேரம் தரிசனம் வழங்கப்படும். மலைகளில் பக்தர்கள் பயணிக்க அனுமதிக்கப்படுவதற்கு முன்னர் வாகனங்கள் அலிபிரி சோதனைச் சாவடியில் சுத்திகரிக்கப்படும். மேலும் மலை சன்னதிக்கான நடைப்பாதை சிறிது நேரம் மூடப்பட்டிருக்கும்.

திருப்பதியில் தங்குமிட முன்பதிவும் ஆன்லைனில் உள்ளது. ஒரு அறையில் இரண்டு நபர்கள் மட்டுமே அனுமதிக்கப்படுவார்கள். விடுதி முன்பதிவு ஒரு நாளுக்கு மட்டுமே பக்தர்கள் தங்க அனுமதிக்கப்படுகிறது.