“தியேட்டர்களில் 100% இருக்கை” முதல்வர் உரிய முடிவை எடுப்பார் என்று அமைச்சர் உறுதி!

தியேட்டரில் 100% ரசிகர்களுக்கு அனுமதி குறித்து முதல்வர் அதிகாரிகளுடன் ஆலோசனை நடத்தி உரிய முடிவு எடுப்பார் என்று அமைச்சர் கடம்பூர் ராஜூ தெரிவித்துள்ளார்.

கொரோனா காரணமாக தமிழகத்தில் கடந்த மார்ச் மாதம் தியேட்டர்கள் மூடப்பட்ட நிலையில் மீண்டும் கொரோனா குறைய தொடங்கியதால் தியேட்டர்கள் கட்டுப்பாடுகளுடன் திறக்கப்பட்டன. கடந்த அக்டோபர் மாதம் திறக்கப்பட்ட தியேட்டர்களில் 50% பார்வையாளர்களுக்கு மட்டுமே அனுமதி வழங்கப்பட்டது. இருப்பினும் இந்த சமயத்தில் புதிய படங்கள் எதுவும் திறக்கப்படவில்லை. இதை தொடர்ந்து திரைத்துறையினர் 100% இருக்கைகளுடன் தியேட்டர்கள் செயல்பட அரசு அனுமதி அளிக்கவேண்டும் என்று கோரப்பட்டது. அவர்களின் கோரிக்கையை ஏற்று அதற்கான அரசாணையும் வெளியிடப்பட்டது. இதற்கு பல்வேறு தரப்பினரும் எதிர்ப்பு தெரிவித்து வருகின்றனர். அத்துடன் மத்திய உள்துறை இந்த அறிவிப்பு குறித்து அதிருப்தியை தெரிவித்துள்ளது.

இந்நிலையில் தூத்துக்குடி மாவட்டம் கோவில்பட்டியில் செய்தியாளர்களை சந்தித்த அமைச்சர் கடம்பூர் ராஜூ, “கொரோனா பரவல் தற்போது குறைந்துள்ளதால் தான் திரைத்துறையினர் கோரிக்கையை ஏற்று முதல்வர் பழனிசாமி 100 % இருக்கைகளுடன் திரையரங்குகள் செயல்பட அனுமதியளித்தார். தற்போது மத்திய அரசு சில ஆலோசனைகளை கூறியுள்ளது என்பதால் இதுகுறித்து முதல்வர் அதிகாரிகளுடன் ஆலோசனை நடத்தி உரிய முடிவை எடுப்பார் ” என்றார்.