தமிழக வெற்றிக் கழகத்தின் முதல் மாநில மாநாடு தொடர்பான அதிகாரப்பூர்வ அறிவிப்பினை அக்கட்சியின் தலைவர் விஜய் நாளை வெளியிட உள்ளதாக தகவல் வெளியாகி உள்ளது.
நடிகர் விஜய் கடந்த பிப்ரவரி 2ஆம் தேதி தமிழக வெற்றிக் கழகம் என்ற கட்சியை தொடங்கினார். அன்றைய தினத்தில் இருந்தே அவரது நகர்வுகள் தொடர்பான எதிர்பார்ப்புகள் அதிகரித்தது. ஒரு புறம் தான் திட்டமிட்டிருந்த படங்களிலும் மறுபுறம் கட்சியின் செயல்பாடுகளில் தீவிரமாக கவனம் செலுத்தி வந்தார். குறிப்பாக இரண்டு கோடி உறுப்பினர்கள் இலக்கு, தொகுதிவாரியாக நிர்வாகிகள் நியமிப்பது, கட்சியின் கொடி, முதல் மாநில மாநாடு ஆகிய பணிகளை தொடர்ந்து மேற்கொண்டு வந்தார்.
இந்நிலையில் சமீபத்தில் கட்சி கொடியும் அறிமுகப்படுத்தப்பட்டு, மாநாடு பணிகளும் விறுவிறுப்பாக நடைபெற்று வந்தது. அதனைத் தொடர்ந்து தேர்தல் ஆணையத்தில் பதிவு பெற்ற கட்சியாகவும் தமிழக வெற்றிக் கழகம் மாறியதை கட்சியின் தலைவர் விஜய் அறிவிக்க விரைவில் மாநாடு குறித்த அறிவிப்பும் வெளியாகும் என தெரிவித்திருந்தார். இதே நேரத்தில் தமிழக வெற்றி கழகம் மாநாடு நடத்த அனுமதி கூறி இருந்த நிலையில் பல நிபந்தனைகளுடன் மாநாடு நடத்த அனுமதியும் காவல்துறை வழங்கி இருந்தது. ஆனால் குறைந்த நாட்களே இருப்பதால் மாநாடு தள்ளி வைக்கலாம் எனவும் பேச்சுகள் எழுந்தது. அந்த வகையில் நாளைய தினம் தமிழக வெற்றிக் கழகத்தின் முதல் மாநில மாநாடு குறித்த அதிகாரப்பூர்வ அறிவிப்பினை அக்கட்சியின் தலைவர் விஜய் வெளியிட உள்ளதாக தகவல் வெளியாகி உள்ளது.