தனுஷ் தொடர்ந்த வழக்கு- நயன்தாரா, விக்னேஷ் சிவன் பதிலளிக்க ஐகோர்ட் உத்தரவு

நானும் ரவுடி தான் பட பிடிப்பு காட்சிகளை பயன்படுத்தியதற்காக நடிகை நயன்தாராவுக்கு எதிராக நடிகர் தனுஷின் வொண்டர் பார் நிறுவனம்  சென்னை உயர்நீதிமன்றத்தில் வழக்கு தாக்கல் செய்துள்ளது. 

நடிகை நயன்தாரா தனது திருமண ஆவண படத்துக்கு நடிகர் தனுஷின் வொண்டர் பார் நிறுவனம் தயாரித்த நானும் ரவுடிதான் படத்தின் படப்பிடிப்பு காட்சிகளை அனுமதியின்றி பயன்படுத்தியதாக கூறி, 10 கோடி ரூபாய் இழப்பீடு வழங்க வேண்டும் என நடிகை நயன்தாராவுக்கு தனுஷ் தரப்பில் வழக்கறிஞர் நோட்டீஸ் அனுப்பப்பட்டு இருந்தது.  இந்த நோட்டீசுக்கு பதிலளித்து நடிகை நயன்தாரா வெளியிட்ட அறிக்கை, தமிழ் மட்டுமல்லாமல் தென்னிந்திய திரையுலகங்களில் பெரும் அதிர்வலைகளை ஏற்படுத்தி இருந்தது. 

இந்த சூழ்நிலையில் நடிகை நயன்தாராவுக்கு எதிராக  நடிகர் தனுஷின் வொண்டர் பார் நிறுவனம் தரப்பில் ரூ.1 கோடி நஷ்ட ஈடு கோரி  சென்னை உயர்நீதிமன்றத்தில் வழக்கு தாக்கல் செய்யப்பட்டுள்ளது. அந்த மனுவில், மும்பையைச் சேர்ந்த நெட்பிலிக்ஸ் நிறுவனத்துக்கு எதிராக வழக்கு தாக்கல் செய்ய அனுமதி கோரி வொண்டர்பார் நிறுவனம் தரப்பில் மனுத்தாக்கல் செய்யப்பட்டது.

இந்த மனுவை விசாரித்த நீதிபதி அப்துல் குத்தூஸ், எதிர்மனுதாரர்களாக சேர்க்கப்பட்டுள்ள நயன்தாரா மற்றும்  விக்னேஷ் சிவன் ஆகியோர் சென்னையில் வசிப்பதாகக் கூறி, இந்த வழக்கை தாக்கல் செய்ய வொண்டர் பார் நிறுவணத்துக்கு அனுமதி அளித்து உத்தரவிட்டுள்ளார். இந்த மனுவை விசாரணைக்கு ஏற்ககூடாது என்று நயன்தாரா தரப்பில் ஆஜரான வக்கீல் எதிர்ப்பு தெரிவித்தார். இதைக் கேட்ட நீதிபதி பிரதான  வழக்கு விசாரணைக்கு  கூறும் பொழுது உங்கள் எதிர்ப்பைத் தெரிவியுங்கள் என்று  கருத்து கூறி வழக்கு விசாரணையை அடுத்த வாரத்திற்கு ஒத்தி வைத்தார்.