‘சூரரை போற்று’ திரைப்படம் குறிப்பிட்ட தேதியில் வெளியாகாது- சூர்யா

இறுதிச்சுற்று படத்தின் இயக்குநர் சுதா கொங்கரா இயக்கத்தில் நடிகர் சூர்யா நடித்துவரும் திரைப்படம் சூரரைப் போற்று. இந்த படத்தில் தெலுங்கு நடிகர் மோகன் பாபு, நடிகை அபர்ணா பாலமுரளி, ஜாக்கி ஷெராப் உட்பட பலர் நடித்துள்ளனர். சூர்யாவின் 2 டி என்டர்டெயின்மென்ட் நிறுவனமும் சிக்யா என்டர்டெயின்மென்ட் நிறுவனமும் இணைந்து தயாரித்துள்ள இப்படத்துக்கு ஜி.வி.பிரகாஷ் இசையமைத்துள்ளார். நிக்கேத் பொம்மிரெட்டி ஒளிப்பதிவு செய்துள்ளார். இந்தியாவில் முதல் பட்ஜெட் விமானப் பயணத்தை உருவாக்கிய ஏர் டெக்கான் உரிமையாளர் ஜி.ஆர்.கோபிநாத் வாழ்க்கையை மையப்படுத்தி எடுக்கப்பட்டுள்ளது. ஆனால் இது வாழ்க்கை வரலாறு படமல்ல.

இந்நிலையில் ரசிகர்கள் ஆவலுடன் காத்திருந்த சூரரைப் போற்று திரைப்படம் அமேசான் பிரைமில் அக்டோபர் 30 ஆம் தேதி வெளியாகும் என அறிவிக்கப்பட்டது. இந்நிலையில் சூரரைப் போற்று படத்தின் பின்னணி வேலைகள் இன்னும் முடியவில்லை என்றும், ரிலீஸ் குறித்த முக்கிய முடிவு அமேசான் வசம் இருப்பதால், அவர்கள் எடுப்பதே இறுதி முடிவு எனவும் நடிகர் சூர்யா அறிக்கை வாயிலாக தெரிவித்துள்ளார்.

படத்தில் விமானப்படை தொடர்பான காட்சிகள் வருவதால் படத்தை வெளியிட இந்திய விமானப்படையிலிருந்து தடையில்லா சான்றிதழ் கிடைக்க வேண்டும் அதுவும் படம் தாமதமாக ரிலீஸ் ஆவதற்கான ஒரு காரணம் என்றும் விரைவில் படத்தின் ட்ரைலர் மற்றும் பல ஆச்சர்யங்களுடன் உங்களை சந்திக்கிறோம் என்றும் நடிகர் சூர்யா குறிப்பிட்டுள்ளார்.