எஸ்.எஸ்.ஐ வில்சன் கொலை வழக்கு… சகாபுதீன் உள்பட இருவருக்கு, 5 நாள் போலீஸ் காவல்…

சென்னை

சிறப்பு உதவி ஆய்வாளர் வில்சன் கொலை வழக்கில் கைதான சகாபுதீன் உள்ளிட்ட இருவரை 5 காவலில் எடுத்து விசாரிக்க என்ஐஏ-வுக்கு, சிறப்பு நீதிமன்றம் அனுமதி வழங்கியது.

கடந்த ஆண்டு குமரி மாவட்டம் களியாக்காவிளையில் வாகன சோதனையில் ஈடுபட்டிருந்த எஸ்.எஸ்.ஐ வில்சன் மர்மநபர்களால் சுட்டுக்கொல்லப்பட்டார். இந்த வழக்கில் விசாரணை மேற்கொண்டு வரும் என்ஐஏ அதிகாரிகள், ஏற்கனவே 6 பேரை கைதுசெய்த நிலையில் 7-வதாக சகாபுதீன் என்பவரை கைதுசெய்தனர். மேலும், கொலையாளிகளுக்கு சிம் கார்டுகள் மற்றும் போலி ஆணவங்கள் தயாரித்து கொடுத்ததாக பெங்களூரில் சையத் அலி என்பரையும் கைதுசெய்திருந்தனர்.

இவர்கள் இருவரையும் 10 நாட்கள் போலீஸ் காவலில் எடுத்து விசாரிக்க அனுமதி கோரி, பூந்தமல்லியில் சிறப்பு நீதிமன்றத்தில், என்ஐஏ அதிகாரிகள் மனு தாக்கல் செய்தனர். மனுவை விசாரித்த நீதிபதி செந்தூர்பாண்டியன், இருவரையும் 5 நாட்கள் போலீஸ் காவலில் விசாரிக்க அனுமதி வழங்கி உத்தரவிட்டார். மேலும், அவர்களை வரும் 23ஆம் தேதி மீண்டும் நீதிமன்றத்தில் ஆஜர்படுத்தவும் அவர் உத்தரவிட்டார். இதனை தொடர்ந்து இருவரையும் ரகசிய இடத்தில் வைத்து விசாரணை நடத்த என்ஐஏ அதிகாரிகள் அழைத்துச்சென்றனர்.