“பெரியார் பிறந்த நாள் சமூகநீதி நாளாக கொண்டாடப்படும்” – முதல்வர் ஸ்டாலின் அதிரடி அறிவிப்பு!

பெரியாரின் பிறந்தநாளான செப்டம்பர் 17ஆம் தேதி ஆண்டுதோறும் சமூக நீதி நாளாக கொண்டாடப்படும் என்று முதலமைச்சர் மு.க.ஸ்டாலின் தெரிவித்துள்ளார்.

பெரியார் பிறந்த நாளான செப்டம்பர் 17ஆம் தேதி சமூக நீதி நாளாக கொண்டாடப்படும் என முதல்வர் மு.க. ஸ்டாலின் அறிவித்துள்ளார் . இந்தியா முழுவதும் சமூக நீதி பரவ அடித்தளம் அமைத்தவர் பெரியார் என்றும் ஸ்டாலின் புகழாரம் சூட்டியுள்ளார்.சட்டமன்றத்தில் 110 விதியின் கீழ் பேசிய முதலமைச்சர் மு.க.ஸ்டாலின், “சமூகநீதி கதவைத் திறந்தது பெரியாரின் கைத்தடி; தமிழ்நாடு மட்டுமல்ல இந்தியா முழுவதும் சமூகநீதி இருப்பதற்கு காரணம் பெரியாரின் அடித்தளம் தான். யாரும் எழுதத் தயங்கியதை எழுதியவர்; யாரும் பேச தயங்கியதை பேசியவர் பெரியார். பெரியாரின் குருகுல பயிற்சிதான் திமுகவை உருவாக்கியது.

பெரியாரின் போராட்டம் குறித்து பேசுவது என்றால் அவை பத்து நாட்கள் ஒத்தி வைத்துவிட்டு தான் பேச வேண்டும் . சாதி ஒழிப்பு, பெண்ணடிமை ஒழிப்புதான் பெரியாரின் இலக்கு; அவர் உருவாக்கிய பகுத்தறிவு கூர்மையால் தமிழினம் சிந்தனை பெற்றது. எனவே பெரியார் பிறந்தநாளான செப்டம்பர் 17ம் தேதி சமூகநீதி நாளாக கொண்டாடப்படும். செப்டம்பர் 17 சமூக நீதி நாள் அன்று அனைத்து அரசு அலுவலகங்களிலும் சாதிய ஏற்றத்தாழ்வுகளை உதறித் தள்ளுவோம்; பெண்களை சரிசமாக கருதுவோம் என்ற உறுதிமொழி எடுக்கப்படும்” என்றார்.