நியூயார்க்கில் கொரோனாவால் பலியாவோர் எண்ணிக்கை முதன்முறையாக 100-க்கு கீழ் குறைந்தது

நியூயார்க்: அமெரிக்காவின் நியூயார்க் நகரில் கொரோனா நோய்த் தொற்றுக்கு பலியாவோர் எண்ணிக்கை 100-க்கு கீழ் குறைந்துள்ளது.

நேற்றைய நிலவரப்படி அமெரிக்காவில் கொரோனா வைரஸ் நோய்த் தொற்று காரணமாக 97,048 பேர் இறந்துள்ளனர். மேலும், இதுவரை 16 லட்சத்து 60 ஆயிரத்திற்கும் மேற்பட்டோர் கொரோனாவால் பாதிக்கப்பட்டு உள்ளனர். அதில் 4 லட்சத்து 46 ஆயிரத்திற்கும் மேற்பட்டோர் கொரோனா தாக்கத்தில் இருந்து பிழைத்து வந்துள்ளனர். இன்னும் ஓரிரு தினங்களில் அமெரிக்காவில் கொரோனாவால் இறந்தவர்களின் எண்ணிக்கை ஒரு லட்சத்தை கடந்து விடும்.

அமெரிக்காவில் நியூயார்க் நகரில் தான் கொரோனா வைரஸ் தொற்று ருத்ர தாண்டவம் ஆடியுள்ளது. அங்கு இதுவரை 29 ஆயிரத்திற்கும் மேற்பட்டோர் கொரோனா தொற்றால் இறந்துள்ளனர். மேலும் 3 லட்சத்து 69 ஆயிரத்திற்கும் மேற்பட்டோருக்கு கொரோனா பாதிப்பு உறுதி செய்யப்பட்டுள்ளது. இந்த நிலையில், கடந்த 24 மணி நேரத்தில் நியூயார்க்கில் கொரோனாவால் 84 பேர் இறந்துள்ளனர். மார்ச் 24-ஆம் தேதியில் இருந்து பார்த்தால் நியூயார்க் நகரில் முதன்முறையாக கொரோனாவால் இறந்தவர்கள் எண்ணிக்கை 100-க்கு கீழ் சென்றுள்ளது.