உள்ளாட்சி தேர்தலுக்கான மனு தாக்கல் இன்று தொடங்கிய நிலையில், மாவட்ட ஊராட்சி வார்டு உறுப்பினர் பதவிகளுக்கு ஒருவர் கூட இன்று மனுத்தாக்கல் செய்யவில்லை.
தமிழகத்தில் புதிதாக பிரிக்கப்பட்ட செங்கல்பட்டு, திருப்பத்தூர், ராணிப்பேட்டை, தென்காசி, கள்ளக்குறிச்சி, திருநெல்வேலி, விழுப்புரம், காஞ்சிபுரம், வேலூர் ஆகிய மாவட்டங்களில் ஊரக உள்ளாட்சி தேர்தல் நடைபெறவுள்ளது. வருகிற அக்டோபர் 6 மற்றும் 9 ஆம் தேதிகளில் உள்ளாட்சி தேர்தல் 2 கட்டங்களாக நடைபெறவுள்ளது. இதற்கான வேட்புமனு தாக்கல் இன்று தொடங்கி, செப் 22 ஆம் தேதி வரை நடைபெறவுள்ளது. செப்-23 ஆம் தேதி வேட்புமனு பரிசீலனை செய்யப்படும் மற்றும் செப்-25 ஆம் தேதி வேட்புமனுவை திரும்பப்பெற இறுதி நாள் என்றும் தேர்தல் ஆணையம் அறிவித்துள்ளது.
இந்நிலையில் வேட்பு மனுத்தாக்கல் தொடங்கிய முதல் நாளான இன்று 378 மனுக்கள் பெறப்பட்டுள்ளன . 351 மனுக்கள் கிராம ஊராட்சி வார்டு உறுப்பினர் பதவிகளுக்கும், 25 மனுக்கள் கிராம ஊராட்சி தலைவர் பதவிகளுக்கும், 2 மனுக்கள் ஊராட்சி ஒன்றிய வார்டு உறுப்பினர் பதவிகளுக்கும் தாக்கல் செய்யப்பட்டுள்ளது. மாவட்ட ஊராட்சி வார்டு உறுப்பினர் பதவிகளுக்கு ஒருவர் கூட இன்று மனுத்தாக்கல் செய்யவில்லை.