காங்கிரசின் இந்துத்துவா ஆதரவு நிலைப்பாட்டை ராகுல், பிரியங்கா காந்தி பின்பற்றுகிறார்கள்.. பினராயி விஜயன்

அயோத்தியில் ராமர் கோயில் கட்டுமான பணிக்கான பூமி பூஜைக்கு காங்கிரசின் முக்கிய தலைவர்களான ராகுல் காந்தியும், பிரியங்கா காந்தியும் வாழ்த்து தெரிவித்தது எனக்கு ஆச்சரியம் அளிக்கவில்லை என செய்தியாளர்களின் சந்திப்பின் போது கேரள முதல்வர் பினராயி விஜயன் தெரிவித்தார். இது தொடர்பாக அவர் மேலும் கூறியதாவது: அயோத்தி பற்றி பிரியங்கா காந்தி கூறியது குறித்து எனக்கு ஆச்சரியமில்லை. ராஜீவ் காந்தி முதல் நரசிம்ம ராவ் வரை, காங்கிரஸ் இதே போன்ற நிலைப்பாட்டை பின்பற்றியது.

மதச்சார்பின்மை என்று வரும் போது அதில் காங்கிரசுக்கு எந்தவித நிலைப்பாடும் இருப்பதாக நான் நினைக்கவில்லை. அப்படி இருந்திருந்தால் நம் நாடு இத்தகைய நிலையை எட்டியிருக்காது. இந்த விவகாரத்தில் ராகுல் காந்தி அல்லது பிரியங்கா காந்தியின் நிலைப்பாட்டில் புதிதாக எதுவும் இல்லை. அவர்கள் காங்கிரசின் மென்மையான இந்துத்துவா நிலைப்பாட்டை பின்பற்றுகிறார்கள். அதில் ஆச்சரியத்தின் எந்த கூறுகளும் இல்லை. அயோத்தி கோயில் கட்டுமானம் குறித்து மார்க்சிஸ்ட் கம்யூனிஸ்ட் கட்சியின் பொலிட்பீரோ தனது கருத்தை தெளிவுப்படுத்தியுள்ளது.

அயோத்தி பிரச்சினை எப்போது வருகிறது. அங்கு வழிபாடு நடத்த அனுமதி அளித்தது யார் என்பதை கேட்க விரும்புகிறேன். அது காங்கிரஸ். சிலையை அங்கு வைக்க அனுமதி கொடுத்தது யார்? அது காங்கிரஸ். கரசேவாவுக்கு அனுமதி கொடுத்தது யார்?. அது காங்கிரஸ். பாபர் மசூதியை இடிக்க வந்த போது கண்களை மூடி கொண்டும், அமைதியாக அனுமதி கொடுத்தார்கள். மையத்தில் காங்கிரஸ் ஆட்சி இல்லையா? மற்றும் முஸ்லிம் லீக்கும் அதன் ஒரு பகுதி. இவை அனைத்தும் நம் வரலாற்றின் ஒரு பகுதி. இது குறித்து ஆலோசனைகளில் ஈடுபடுவதற்கு பதிலாக நாட்டில் பரவும் கொரோனா வைரஸை கட்டுப்படுத்துவதற்கும், தொற்றுநோயால் பாதிக்கப்பட்ட ஏழைகளுக்கு உதவவும் அதிக நேரத்தை பயன்படுத்த வேண்டும். இவ்வாறு அவர் தெரிவித்தார்.