காடுவெட்டி குரு உடலை எடுத்துச் செல்லக்கூட உதவாத ராமதாஸ்! – வைரல் ஆகும் ஜெகத்ரட்சகன் பழைய வீடியோ

காடுவெட்டி குருவின் இரண்டாம் ஆண்டு நினைவுதினம் நேற்று அனுசரிக்கப்பட்டது. காடுவெட்டி குருவின் புகைப்படத்தை தரையில் வைத்து டாக்டர் ராமதாஸ் அஞ்சலி செலுத்தியது பற்றி பலரும் கேள்விகளை எழுப்பினர். அதற்கு பா.ம.க-வினர் பதிலடி கொடுத்து வருகின்றனர்.

தி.மு.க-வினர் கடுமையாக பதிவிட்டு வருவதைத் தொடர்ந்து டாக்டர் ராமதாஸ் இன்று ஒரு ட்வீட் வெளியிட்டார். அதில் தமிழகத்தின் பெரிய அரசியல் தலைவர் ஒருவர் பெயரை குறிப்பிட்டு அவரை நம்ப வேண்டாம் என்று கருணாநிதி தன்னிடம் ஒருமுறை கூறியதாக கொளுத்திப்போட்டார்.

இந்த நிலையில் காடுவெட்டி ஜெ.குரு உடலைக் கூட எடுத்துச் செல்ல டாக்டர் ராமதாஸ் உதவவில்லை, நான்தான் ரூ.3 லட்சம் கொடுத்தேன் என்று ஜெகத்ரட்சகன் பேசிய பழைய வீடியோவை தி.மு.க-வினர் தற்போது வைரல் ஆக்கி வருகின்றனர்.
அந்த வீடியோவில் ஜெகத்ரட்சகன், “காடுவெட்டி குரு’ மறைந்து அவர் உடலை மருத்துவமனையிலிருந்து எடுத்துச்செல்ல அவர்கள் குடும்பத்துக்கு மூன்று லட்சம் தேவைப்பட்டது. அதைக்கூட நான் தானே கொடுத்தேன். இதை பெருமைக்காக கூறவில்லை… அந்த பணத்தை நீங்கள் அல்லவா கொடுத்திருக்க வேண்டும். அதேபோல் இட ஒதுக்கீட்டுக்காக உயிர்விட்ட 21 குடும்பங்கள் இன்று தத்தளிக்கின்றன. அவர்களுக்கு ராமதாஸ் ஏதும் செய்திருக்கிறாரா?” என்று கேள்வி எழுப்பியுள்ளார் ஜெகத்ரட்சகன். இந்த வீடியோ விக்ரவாண்டி இடைத்தேர்தல் பிரசாரத்தின்போது எடுக்கப்பட்டது என்பது குறிப்பிடத்தக்கது.