“பிழைத்து போகட்டும் என்று ரம்யா பாண்டியனுக்கு ஓட்டு போட்டேன்” : அதிமுக முன்னாள் அமைச்சர் பேச்சு!

பிழைத்த போகட்டும் என்று ரம்யா பாண்டியனுக்கு நான் ஓட்டு போட்டேன் என்று வைகைச்செல்வன் தெரிவித்துள்ளார்.

மறைந்த முன்னாள் முதல்வர் எம்ஜிஆரின் 104-வது பிறந்த நாள் நேற்று தமிழகம் முழுவதும் அக்கட்சியினரால் சிறப்பாக கொண்டாடப்பட்டது. அந்த வகையில் காஞ்சிபுரம் காந்தி ரோட்டில் எம்ஜிஆரின் பிறந்தநாளையொட்டி நடந்த அதிமுக பொதுக்கூட்டத்தில் அதிமுக செய்தித் தொடர்பாளர் வைகைச்செல்வன் கலந்து கொண்டார்.

நிகழ்ச்சியில் கலந்து கொண்டு பேசிய வைகைச்செல்வன் , “வாக்காளர்களுக்கு கடன் வைத்த ஒரே நபர் டிடிவி தினகரன். இது உலக அரசியல் வரலாற்றிலேயே நடக்காத ஒன்று . நடிகர் ரஜினிகாந்த் வாடகை பாக்கி வைத்திருந்தார்; கடைசியில் என்னிடம் வாடகை கேட்காதீர்கள், நான் அரசியலுக்கு வரவில்லை என்று கூறிவிட்டு சென்று விட்டார். பிக்பாஸில் பங்குபெற்ற ஷிவானி, ரம்யா பாண்டியனுக்கு கிடைத்த ஓட்டுகள் கூட கமல் ஹாசனுக்கு கிடைக்காது. நான் ரம்யா பாண்டியனுக்கு 5 ஓட்டுகள் போட்டுள்ளேன். அவர் நல்ல பெண்ணாக தெரிந்ததால் பிழைத்து போகட்டும் என்று ஓட்டு போட்டேன். 3 கோடி, 4 கோடி ஓட்டுகள் விழ, பிக் பாஸ் போட்டி ஒன்றும் சட்டமன்ற தேர்தல் இல்லை” என்றார்.