விவசாயிகளின் பரிந்துரைகளை ஏற்க அரசு தயார் – மத்திய அமைச்சர் நிதின் கட்கரி

பாஜக ஆட்சியில் விவசாயிகளுக்கு எந்த அநீதியும் இழைக்கப்படாது என்று மத்திய அமைச்சர் நிதின் கட்கரி தெரிவித்துள்ளார் .

மத்திய அரசின் 3 வேளாண் சட்டங்களுக்கு எதிராக டெல்லியில் விவசாயிகள் போராட்டம் நடத்தி வருகின்றனர். இந்த போராட்டத்தில் பஞ்சாப், ஹரியானா உள்ளிட்ட மாநிலங்களை சேர்ந்த விவசாயிகள், 19 நாட்களாக தொடர் போராட்டத்தில் ஈடுபட்டு வருகின்றனர். இதனிடையே கடந்த 8-ஆம் தேதி நாடு தழுவிய வேலை நிறுத்தப் போராட்டத்தை நடத்தினர். இதற்கு எதிர்க்கட்சி தலைவர்கள் ஆதரவு தெரிவித்தனர்.

அதே சமயம் போராட்டத்தின் அடுத்த கட்டமாக சிங்கு எல்லை, காஜிப்பூர் எல்லை, நொய்டா எல்லை என பல பகுதிகளில் விவசாயிகள் நேற்று முதல் உண்ணாவிரத போராட்டத்தில் ஈடுபட தொடங்கினர்.

இந்நிலையில் டெல்லியில் செய்தியாளர்களை சந்தித்த மத்திய அமைச்சர் நிதின் கட்கரி, “புதிய வேளாண் சட்டங்களை விவசாயிகள் புரிந்து கொள்ள வேண்டும். பாஜக அரசு விவசாயிகளுக்காக அர்ப்பணிப்புடன் செயல்படுகிறது. அவர்களின் பரிந்துரைகளை ஏற்க தயாராக உள்ளது . பாஜக ஆட்சியில் விவசாயிகளுக்கு எந்த அநீதியும் இழைக்கப்படாது” என்றார்.