3-வது நாளாக அரசு பஸ் ஊழியர்கள் ஸ்டிரைக் : மக்கள் அவதியால் பேச்சுவார்த்தைக்கு அழைப்பு !

வேலை நிறுத்தத்தில் ஈடுபட்டுள்ள போக்குவரத்து தொழிலாளர்களை தொழிலாளர் நல ஆணையம் பேச்சுவார்த்தைக்கு அழைத்தது.

தமிழகம் முழுவதும் 3-வது நாளாக அரசு பஸ் ஊழியர்கள் வேலைநிறுத்தப் போராட்டத்தில் ஈடுபட்டுள்ளனர். ஓய்வூதியதாரர்களுக்கு பணப்பலன், 14வது ஊதிய உயர்வு ஒப்பந்த பேச்சுவார்த்தை தொடங்க கோரி தொ.மு.ச., சி.ஐ.டி.யு., ஏ.ஐ.டி.யு.சி., உள்ளிட்ட 9 தொழிற்சங்கக் கூட்டமைப்பு வேலைநிறுத்தப் போராட்டத்தில் ஈடுபட்டு வருகின்றனர். அரசு ஊழியர்களின் ஸ்டிரைக்கால் பேருந்துகள் வழக்கத்தைவிட மிக மிகக் குறைந்த அளவில் இயக்கப்படுவதால் மக்கள் அவதிக்குள்ளாகி உள்ளனர்.

இந்நிலையில் வேலைநிறுத்தத்தில் ஈடுபட்டுள்ள போக்குவரத்து தொழிலாளர்களை பேச்சுவார்த்தைக்கு அழைத்தது தொழிலாளர் நல ஆணையம் .மூன்றாம் நாளாக வேலைநிறுத்தப் போராட்டத்தில் ஈடுபட்டுள்ள அரசு பஸ் ஊழியர்களுடன் இன்று பேச்சுவார்த்தை நடைபெறுகிறது. சென்னை தேனாம்பேட்டை டிஎம்எஸ் வளாகத்தில் மாலை 3 மணிக்கு துணை ஆணையர் லட்சுமிகாந்தன் 9 தொழிற்சங்கங்கள் போக்குவரத்து துறை அதிகாரிகளுடன் முத்தரப்பு பேச்சுவார்த்தையில் ஈடுபடுகிறார்.

அத்துடன் புதுக்கோட்டையில் தனியார் பேருந்துகளில் மூன்று மடங்கு கூடுதலாக கட்டணம் வசூலிப்பதாக புகார் எழுந்துள்ளது. பஸ் தொழிலாளர்களின் வேலை நிறுத்தத்தால் குறைவாக அரசு பேருந்துகள் இயக்கப்படுவதை பயன்படுத்தி வசூல் செய்யப்படுவதாகபொதுமக்கள் புகார் கூறியுள்ளனர்.