பிளஸ் 2 பொதுத்தேர்வு குறித்து கருத்து கேட்க முடிவு : அமைச்சர் அன்பில் மகேஷ் விளக்கம்!

பன்னிரண்டாம் வகுப்பு பொதுத் தேர்வை நடத்துவதா? வேண்டாமா? என கல்வியாளர்கள் மருத்துவ வல்லுநர்களுடன் ஆலோசித்து முடிவு எடுக்கப்படும் என்று அமைச்சர் அன்பில் மகேஷ் தெரிவித்துள்ளார்.

இந்தியாவில் கொரோனா 2வது அலையை கருத்தில் கொண்டு சிபிஎஸ்இ 12-ம் வகுப்பு பொதுத்தேர்வுகள் ரத்து செய்யப்படுவதாக மத்திய அரசு அறிவித்துள்ளது.கொரோனா சூழலில் மாணவர்கள் நலன் கருதி தேர்வுகள் ரத்து செய்யப்பட்டிருப்பதாக தெரிவிக்கப்பட்டுள்ளது.இந்த சூழலில் தமிழகத்தில் பிளஸ் 2 பொதுத்தேர்வு தொடர்பாக முதல்வர் மு.க.ஸ்டாலின் தலைமையில் இன்று ஆலோசனை நடைபெற்றது. சிபிஎஸ்இ பிளஸ் 2 பொதுத் தேர்வு குறித்த அறிவிப்புக்குப் பிறகே, தமிழகத்தில் பிளஸ் 2 பொதுத்தேர்வு குறித்து முடிவு எடுக்கப்படும் என்று பள்ளிக்கல்வித்துறை அமைச்சர் அன்பில் மகேஷ் பொய்யாமொழி ஏற்கனவே தெரிவித்த நிலையில் நேற்று சிபிஎஸ்இ தேர்வு ரத்து செய்யப்படுவதாக அறிவிக்கப்பட்டது. இதனால் முதல்வருடன் அவசர ஆலோசனை நடைபெற்றது.

இந்நிலையில் சென்னை தலைமை செயலகத்தில் செய்தியாளர்களை சந்தித்த அமைச்சர் அன்பில் மகேஷ் , “பன்னிரண்டாம் வகுப்பு பொதுத் தேர்வை நடத்துவதா வேண்டாமா என கல்வியாளர்கள் மருத்துவ வல்லுனர்களுடன் ஆலோசித்து முடிவெடுக்கப்படும். கல்வியாளர்கள் , மருத்துவ வல்லுனர்கள் உடன் இரண்டு நாட்களில் ஆலோசனை நடத்தி 2 நாட்களில் முடிவெடுக்கப்படும். 12 ஆம் வகுப்பு பொது தேர்வு நடத்துவதில் மாணவ – மாணவிகளிடையே இரு வேறு கருத்துக்கள் நிலவுகிறது. மாணவர்களுடன் பாதுகாப்பு , உடல்நலன் முக்கியம் என முதல்வர் முக ஸ்டாலின் கூறியுள்ளார். பொதுத்தேர்வு மதிப்பெண் முக்கியம் என்பதால் கவனத்துடன் முடிவெடுக்க வேண்டிய சூழல் உள்ளது.நீட் உள்ளிட்ட நுழைவுத் தேர்வுகள் குறித்து விரைவில் முடிவு எடுக்கப்படும்” என்றார்.