போலி இ-பாஸ் பயன்படுத்தினால் கிரிமினல் வழக்குப் போடப்படும் – காவல்துறை எச்சரிக்கை!

கொரோனா வைரஸ் காரணமாக ஊரடங்கு பிறப்பிக்கப்பட்டு இருந்தாலும், சில தளர்வுகள் அளிக்கப்பட்டன. அதாவது ஒரு மாவட்டத்திற்குள் செல்வதற்கு இ-பாஸ் தேவை இல்லை என்றும் பிற மாவட்டங்களுக்குச் சென்று வர பாஸ் கட்டாயம் என்றும் தெரிவிக்கப்பட்டது. அதே போல மற்ற மாநிலங்களிலிருந்து வரும் வாகனங்களும் இ-பாஸ் பெற்றுக் கொண்டு தான் வர வேண்டிய கட்டாயம் நிலவுகிறது. இதனிடையே போலியான இ-பாஸ் பெற்றுச் செல்பவர்களின் எண்ணிக்கையும் அதிகரித்து வருகிறது. அவ்வாறு போலியான இ-பாஸ் பெற்று மக்கள் செல்வது கண்டுபிடிக்கப் பட்டால் கடும் நடவடிக்கை எடுக்கப்படும் என்று எச்சரிக்கை விடுக்கப்பட்டுள்ளது.

இந்த நிலையில் சென்னை மாநகர போக்குவரத்து கூடுதல் காவல் ஆணையர் கண்ணன், ஆட்டோ, லாரி, கால் டாக்சி ஓட்டுநர்களிடம் பேச்சுவார்த்தை நடத்தினார். அப்போது பேசிய அவர், கொரோனாவை தடுக்க மாவட்ட நிர்வாகத்திற்கு ஒத்துழைப்பு கொடுக்க வேண்டும் என்றும் போலி இ-பாஸ் மூலம் சென்றால் கிரிமினல் வழக்கு பதிவு செய்யப்படும் என்றும் கூறினார். மேலும், ஊரடங்கை மீறியதாகப் பிடிபட்ட வாகனங்கள் நாளை கொடுக்கப்படும் என்றும் கூறினார்.